BATE vyjšaŭ u 1/16 Lihi Jeŭropy

BATE ŭ matčy čaćviortaha tura hrupavoha turnira Lihi Jeŭropy pieramoh ciraspalski «Šeryf» ź likam 3:1. Pieramoha zabiaśpiečyła daterminovy vychad z hrupy.

Niahledziačy na nie samuju pryvabnuju šyldu postsavieckaha procistajańnia BATE i «Šeryfa», matč mieŭ kałasalnaje značeńnie, jak dla adnaho boku, tak i dla inšaha. Biełarusy mahli daterminova, za dva tury da finišu, zabiaśpiečyć sabie vychad z hrupy. A ciraspalcam chaciełasia dakazać, što projhryš dvuchtydniovaj daŭniny byŭ vypadkovaściu.

Nadvorje było futbolnym. Jak dla pačatku listapada, to ŭvohule šykoŭnym. I ludziej pryjšło dastatkova. Dzieści tysiač piatnaccać.

Aŭdytoryja śviedčyć, što ŭ vypadku budaŭnictva 13-tysiačnika ŭ Barysavie, jon na matčach takoha ranhu budzie zabivacca pad zaviazku.

Pierad stadyjonam sustreŭ lidara kampanii «Havary praŭdu» Uładzimira Niaklajeva z kiraŭnikom svajho štabu Andrejem Dźmitryjevym. Da ich padychodziŭ namieśnik staršyni Partyi BNF Ryhor Kastusioŭ. Nu z takimi hledačami na trybunach prajhravać nielha :).

Jak i ŭ Ciraspali, BATE znoŭ atrymałasia chutka zabić. Heta niadaŭni junijor Dźmitry Baha, jaki z pryčyny traŭmaŭ niekatorych lidaraŭ vyjšaŭ u asnoŭnym składzie, addaŭ bliskučuju pieradaču na Vitala Radzivonava. Napadajučy nie razhubiŭsia, adarvaŭsia ad abaroncaŭ, pierajhraŭ varatara i z vostraha vuhła trapiŭ dakładna. Abaroncy «Šeryfa» dahnali miač, kali jon užo pierasiok stužačku.

Zabili hoł, i nibyta spałochalisia hetaha. Tak časta byvaje ź biełaruskimi kamandami. A voś małdavanie pajšli napierad. Adzin raz vyratavaŭ Vieramko. Ale na 32-oj chvilinie navat naš bramnik byŭ biaśsilny suprać udara hałavoj Jarochina — 1:1.

Tak pieršy tajm i skončyŭsia. U pryncypie, ličby byli zasłužanymi.

Vyhladaje, što klučavy momant u sustrečy adbyŭsia na 56-aj chvilinie, kali traŭmu atrymaŭ bałharski hałkipier «Šeryfa» Uładzisłaŭ Stajanaŭ. U baraćbie z našym Siarhiejem Sasnoŭskim jon traŭmavaŭ ruku. Potym trenier haściej Saśnicki skaža, što ŭ varatara pierałom.

Na poli źjaviŭsia małady 19-hadovy dublor Dźmitry Stažyła. Dzieści jakraz u hety čas na stadionam zamarasiŭ doždž. Trava stała ślizkaj. Adzin daloki ŭdar Stažyła adbiŭ pierad saboj. Heta nibyta znak — bić treba bolej i z roznych dystancyj.

Na 70-aj chvilinie pośpiech pryjšoŭ da barysaŭcaŭ. Radzivonaŭ pazmahaŭsia na druhim paviersie, paśla čaho miač adskočyŭ da Paŭłava. Rudy ŭ kamandzie — na ŭdaču. Paŭłaŭ siońnia ŭ čarhovy raz heta paćvierdziŭ. Ź jahonym udaram Stažyła nie spraviŭsia.

A praź piać chvilin bliskuča realizavaŭ štrafny brazilec Renan Bresan.

Na kuražy mahli zabić i jašče. Ale dziela spraviadlivaści skažam, što bujnoj parazy «Šeryf» nie zasłuhoŭvaŭ. Kamanda ŭ Ciraspali dobraja. Prosta kankretna ŭ hety viečar BATE byŭ macniej.

A z Kijeva tym časam pryjšli nie mienš pryjemnyja naviny. Były biełarus Arciom Mileŭski zabiŭ dva hały ŭ varoty niderłandskaha AZ. Pieramoha «Dynama» zabiaśpiečyła BATE vychad z hrupy. Takoha ŭ nas jašče nie było.

Viktara Hančarenku na pres-kanfierencyi sustrakali apładysmientami. «My zrabili vialikuju spravu», — skazaŭ nastaŭnik. Ź im niemahčyma było nie pahadzicca. Jaki ŭžo raz davodzicca pramaŭlać: «Brava, BATE!».

***

BATE: Vieramko, Lichtarovič (Skavyš, 67), Sasnoŭski, Šytaŭ, Jurevič, Bardačoŭ, Paŭłaŭ (Vaładźko, 72), Radzivonaŭ, Bresan (Radźkoŭ, 81), Alachnovič, Baha.

Stanovišča paśla 4-ch turaŭ:

BATE — 10 (3 pieramohi, 1 ničyja, 0 parazaŭ, roźnica miačoŭ: 10–4), Dynama — 7 (2, 1, 1, 6–5), AZ — 3 (1, 0, 3, 4 -9), Šeryf — 3 (1, 0, 3, 4–6).

***

Raniejšyja matčy:

16 vieraśnia: Dynama K — BATE 2:2 (Mileŭski, 34, Jaromienka, 44; Radzivonaŭ, 3. Niachajčyk 54), AZ — Šeryf — 2:1

30 vieraśnia: BATE — AZ — 4:1 (Radzivonaŭ, 5, Kancavy, 48, Bresan, 77-pienalci, Alachnovič, 83; Sihtarsan, 89), Šeryf — Dynama K — 2:0.

21 kastryčnika: Šeryf — BATE — 0:1 (Sasnoŭski, 8), AZ — Dynama K — 1:2

2 śniežnia: BATE — Dynama, Šeryf — AZ

15 śniežnia: AZ — BATE, Dynama — Šeryf.

AH

• 0
• 0
• 0
• 0
• 0
• 0
• 0
• 0