Śpiecnaz raśsiok Płošču, kandydaty ŭ prezidenty źbityja j zatrymanyja

Dla stvareńnia padstavy hrupa pravakataraŭ raźbiła dźviery Doma ŭrada. Lik źbitych i zatrymanych idzie na sotni.

Reparciory «Našaj Nivy» pačali viartacca z płoščy Niezaležnaści. Padziei tam razhortvalisia dramatyčna.

Kolkaść mitynhoŭcaŭ na Płoščy dasiahnuła, pavodle roznych acenak, ad 20 da 40 tysiač čałaviek. Z trybuny było ahučanaje hałoŭnaje patrabavańnie: dabivacca praviadzieńnia svabodnych vybaraŭ biez Łukašenki.

Z trybuny Płoščy vystupali palityki, a taksama dziejačy kultury. Kandydaty ŭ prezidenty patrabavali, kab ich prapuścili ŭ Dom urada dla pieramovaŭ.

Napačatku była sproba pracisnucca ŭ dźviery Doma ŭrada, kab pieradać svaje patrabavańni CVK. Kali toje nie ŭdałosia, narod arhanizavana adstupiŭ, pakinuŭšy kalidor ad trybuny da dźviarej.

Na videazdymkach bačna, što demanstranty dziejničali nie ahresiŭna.

Praź niejki čas źjavilisia nieviadomyja pravakatary.

Jany chavali tvary ad žurnalistaŭ, nie davali siabie zdymać i bili kamiery. Jany nie słuchali Vitala Rymašeŭskaha, jaki namahaŭsia ich spynić. Jany stali bić škło ŭ dźviarach budynka. Dźviery Doma ŭrada, miž tym, byli nadziejna zabłakavanyja ščytami AMONa i meblaj, i praniknuć usiaredzinu było niemahčyma.

Pad hety čas ułady pierakinuli na Płošču z boku Savieckaj vulicy niekalki socień śpiecnazaŭcaŭ. Inšyja padraździaleńni śpiecnaza skancentravalisia na praśpiekcie Niezaležnaści. Im byŭ dadzieny zahad raśsiakčy natoŭp, i

prykładna, a 23-j hadzinie pačaŭsia razhon.

Demanstranty pačali adychodzić u adkrytych kirunkach. Videa pakazvajuć, što ludzi nie napadali na śpiecnaz. Jadro demanstrantaŭ praciahvała stajać vakoł pomnika Leninu, zhurtavaŭšy šerahi. Kab złamić mirnaje supraćstajańnie ludziej, siłaviki pačali źbivać i chapać ludziej.

Na vačach u reparcioraŭ «Našaj Nivy» byli zatrymanyja kandydaty ŭ prezidenty krainy Ryhor Kastusioŭ, Andrej Sańnikaŭ, Mikoła Statkievič. Sańnikava žorstka źbili na vačach u žonki.

Kandydat Vital Rymašeŭski taksama byŭ źbity i dastaŭleny ŭ balnicu.

Paźniej stała viadoma, što nieviadomyja ŭ cyvilnym vyvieźli z balnicy mocna źbitaha Uładzimira Niaklajeva, jak tolki adtul syšli žurnalisty, i Rymašeŭskaha.

Darečy, mienavita z napadu na štab Niaklajeva i raspačaŭsia niadzielny viečar.

Jak naziraŭ karespandent «Našaj Nivy», cichary ŭ čornym vysadzilisia z aŭtobusaŭ i napali na štabnuju kałonu Niaklajeva. Imavierna, metaj napadu byŭ busik z hukaŭzmacnialnym abstalavańniem, jaki supravadžała kałona niaklajeŭcaŭ.

Adbyłosia niekalki vybuchaŭ — imavierna, vybuchpakietaŭ.

Tady cichary pakłali demanstrantaŭ na śnieh na vulicy Niamiha. Jany ŭvarvalisia ŭ busik i zachapili abstalavańnie. Paśla hetaha jany źjechali.

Padčas zachopu kandydat u prezidenty Niaklajeŭ byŭ źbity da nieprytomnaści.

Ale my viartajemsia da padziej na Płoščy i praśpiekcie.

Pamiž 23-j i 24-j hadzinami śpiecnaz pierakryŭ dvary i padychody ad Płoščy Niezaležnaści da stancyi mietro «Kastryčnickaja». Jaho metaj było nie dać ludziam iznoŭ arhanizavacca ŭ manifiestacyju. Pačałasia začystka vulic.

Ludziej źbivali, kidali ŭ aŭtazaki.

Kastryčnickaja płošča staić całkam pustaja, na joj kučkujucca tolki rabotniki KDB. Ihraje hučnaja pop-muzyka.

U liku źbitych — dziasiatki žurnalistaŭ, u tym liku žurnalist NN Aleś Pilecki. Jamu paškodzili nahu.

Płošča Niezaležnaści była raźbitaja na siektary i žorstka začyščanaja śpiecnazam, ludziej źbivali dubinkami, nahami. Toje samaje paśla paŭtaryłasia na praśpiekcie Niezaležnaści, vulicy Vaładarskaha.

Sotni ludziej, u tym liku pasły šerahu krain Jeŭrasajuza i kiraŭnik pradstaŭnictva Jeŭrakamisii akazalisia błakavanymi ŭ hateli «Minsk», dzie jany šukali ratunku ad śpiecnaza.

Kala 0.30 nam patelefanavali z dvara izalatara časovaha ŭtrymańnia na vulicy Akreścina. Tudy na heta momant źvieźli kala dvuchsot čałaviek.

Usiaho, pavodle źviestak pravaabaroncaŭ z Centra «Viasna», kolkaść zatrymanych pieravysiła 400 čałaviek. Kala 3.20 ranku my atrymali infarmacyju, što śpiecnazaŭcy ŭvarvalisia i ŭ sam Centr «Viasna», što mieścicca kala Akademii navuk. Na hetym suviaź z pravaabaroncami abarvałasia. Adnak paźniej rankam ich vypuścili.

19 śniežnia apošnim z trybuny Płoščy vystupiŭ paet, staršynia Biełaruskaha PEN-Centra Andrej Chadanovič. Jon praśpiavaŭ, dakładniej recytavaŭ svoj biełaruski pierakład katałonskaj pieśni: «Mur chutka ruchnie!».

Paśla jaho Vital Rymašeŭski tolki paprasiŭ nie bić, nie čapać supracoŭnikaŭ milicyi. Jon zaklikaŭ usich sabracca ŭ paniadziełak, a 18-j hadzinie na płoščy Niezaležnaści, kab praciahvać pratest. Ale niajasna, chto taki pratest zaraz zmoža ŭznačalić.

* * *

Ad abiedu łukašenkaŭskija ŚMI raspaŭsiudžvali «vyniki» ekzit-połaŭ, pavodle jakich Łukašenka pieramahaŭ ź vializnym adryvam. Ad ranku pačalisia previentŭnyja zatrymańni aktyvistaŭ apazicyi. Bližej da viečara ŭ krainie byli adrubleny niezaležnyja veb-sajty. Taksama byŭ spynieny dostup da Gmail, Facebook i LJ. Usio razam heta ŭmacoŭvała ludziej u adčuvańni kradziažu svabody vybaru.

• 0
• 0
• 0
• 0
• 0
• 0
• 0
• 0