Biełarusy viarnulisia ŭ epochu źbiralnictva

Ludzi skuplajuć kalekcyjnyja mašynki, samalociki dy kamiani.

Ledź nie kožny haradžanin choć adnojčy pačynaŭ źbirać kalekcyju z pranumaravanych paznavalnych časopisaŭ, jakija pradajucca ŭ kožnym šapiku. «100 čałaviek, jakija źmianili chadu historyi», «Žyvioły našaj płaniety», «Cieła čałavieka»… — vybar jość na luby hust. Ciažka ŭjavić, što jašče paru hadoŭ tamu takich brašur nie było ŭ prodažy. Jak kalekcyjnyja časopisy stali sapraŭdnaj sacyjalnaj źjavaj u Biełarusi?

Italjanskaja moda

Moda na źbiralnictva pryjšła ŭ našu krainu z susiedniaj Rasii z zatrymkaj u niekalki hadoŭ. Pačynalnicaj idei ličycca Italija. Łahična, što faktyčnym manapalistam na rynku paznavalnych časopisaŭ źjaŭlajecca italjanskaje vydaviectva DeAhastyni (DeAgostini). Svaje pieršyja mini-encykłapiedyi jano stała vydavać 50 hadoŭ tamu, a ŭ 2004 hodzie vyjšła na rasijskamoŭny rynak — Rasiju, Ukrainu, Biełaruś i Kazachstan.

Hałoŭnaje — zaciahnuć

Pryncyp kožnaj sieryi adnolkavy. U prodažy źjaŭlajecca pieršy numar kalekcyi pa dempinhavym košcie. Naprykład, dysk ź videapadarožžam pa Paryžy za 4900 biełaruskich rubloŭ. Ci dźvie brašury pra Piatra I i Tarasa Šaŭčenku (revierans u bok ukrainskaha rynku) za — śmiešna skazać! — 1900 rubloŭ. A pieršy tom u sieryi «Vialikija mastaki» ŭvohule vydavaŭsia biaspłatna pry kupli śviežaha numara «Komsomolskoj pravdy». Hałoŭnaje — prymusić ludziej kupić tanny pieršy vypusk. Da druhoha numara možna prykłaści (znoŭ amal biaspłatna) śpiecyjalnuju papku dla kalekcyjanavańnia… A paśla možna ŭstaloŭvać lubuju canu i źbirać hrošy. Spakusa praciahnuć źbiralnictva och jakaja vialikaja! Śviežy numar vychodzić zvyčajna raz na tydzień ci dvojčy na miesiac. Ahulnyja vydatki na adnu kalekcyju za miesiac nie pieravyšajuć 30 tysiač rubloŭ.

Pryhody kalekcyj u Biełarusi

Pieršaj papularnaj sieryjaj na terytoryi Biełarusi stała kalekcyja z pryhodami mulciašnaha hieroja «Skubi-Du» pa ŭsim śviecie. Dziciačyja kalekcyi pra šachmaty i žyviołaŭ źmianilisia ahulnasiamiejnymi — pra zdaroŭje, viadomych ludziej dy pravasłaŭnyja manastyry.

Ciapier pačaŭsia novy evalucyjny vitok kalekcyjanavańnia — sieryi dla dziaciej i dla darosłych, jakija nie nahulalisia ŭ dziacinstvie. Časopisy pra aŭtalehiendy SSSR i suśvietna viadomyja aŭtamabili, pra samaloty i paruśniki… Pryčym u kamplekcie abaviazkova idzie kalekcyjnaja madelka ŭ kłasičnym maštabie 1:43! Probnyja vypuski razyšlisia na «ŭra».

Adzinkavaja Łatuškava ideja

Naša dziaržava spryčynilisia da prapahandy svajho, biełaruskaha, tolki adnojčy. U kalekcyjnuju sieryju z 80 albomaŭ pra najvybitniejšych mastakoŭ suśvietu ad rasijskaj «Komsomolskoj pravdy» ŭvajšła kniha pra Ivana Chruckaha. Heta była asabistaja inicyjatyva ministra kultury Paŭła Łatuški. U Rasii hety tom u prodaž nie traplaŭ, tam miesca Chruckaha dastałasia piejzažystu Vasilu Palenavu.

Kaściuška jak zamiena Suvoravu i łatarejkam

Na žal, nivodnaje biełaruskaje vydaviectva — ni dziaržaŭnaje, ni pryvatnaje — pakul nie pasprabavała zapuścić svaju kalekcyjnuju sieryju, źviazanuju z ajčynnaj historyjaj ci kulturaj. Kali ŭ kožnym šapiku i adździaleńni banka pakupnikam usimi praŭdami i niapraŭdami ŭpichvajuć łatarejnyja bilety pa 4 000 rubloŭ, to čamu b nie prapanavać na vybar kalekcyjny časopis pra Kalinoŭskaha i Kaściušku za krychu bolšuju canu? A pakul u biełarusaŭ niama inšaha vybaru, čym źbirać kalekcyju z hierojstvami Suvorava i Piatra I.

• 0
• 0
• 0
• 0
• 0
• 0
• 0
• 0