Prakuror Viciebskaj vobłaści Hienadź Dysko zajaviŭ, što viersija pra parušeńnie praviłaŭ achovy pracy na aršanskim miasakansiervavym kambinacie nie paćvierdziłasia. A načalnik abłasnoj słužby MNS Vasil Čekan nazvaŭ čatyroch zahinułych hierojami, jakija «nie skarystalisia šlachami adstupleńnia».
Na bryfinhu dla žurnalistaŭ načalnik abłasnoj upravy MNS Vasil Čekan skazaŭ, što vyratavalniki spracavali chutka i jakasna, tamu 24 maja pažar na miasakanskrvavym kambinacie ŭ Voršy byŭ likvidavany chutka. Jon padkreśliŭ, što dva miesiacy tamu ŭ cechu chaładzilnych ustanovak pravodzilisia vučeńni, jak dziejničać padčas pahrozy vykidu amijaku, tamu rabočyja dziejničali adpaviedna ź instrukcyjami.
«Zahinułyja rabotniki chaładzilnaha cechu prajavili hieraizm, sprabujučy samastojna likvidavać pažar z dapamohaj pieršasnych srodkaŭ pažaratušeńnia, adnak nie ŭličyli śmiarotnuju niebiaśpieku ŭdychańnia atrutnych praduktaŭ hareńnia», — skazaŭ načalnik abłasnoj słužby MNS.
Spadar Čekan padkreśliŭ, što ŭ zahinułych była mahčymaść uratavacca, ale jany «nie skarystalisia šlachami adstupleńnia».
24 traŭnia Aršanskaja haradzkaja prakuratura raspačała kryminalnuju spravu pavodle častki 3 artykuła 306 — «Parušeńnie praviłaŭ achovy pracy, jakoje paciahnuła za saboj praź nieaściarožnaść śmierć čałavieka abo naniasieńnie ciažkoha cialesnaha paškodžańnia dźvium i bolš asobam». Adnak užo 25 maja prakuror Viciebskaj vobłaści Hienadź Dysko zajaviŭ, što hetaja viersija nie paćvierdziłasia, i, vierahodna, spravu pavodle vynikaŭ rasśledavańnia pierakvalifikujuć.
Pryčyny pažaru ŭ techničnaj halerei, jakaja złučaje cech chaładzilnych ustanovak ź pierapracoŭčymi cechami, jašče ŭdakładniajucca. Pavodle pieršapačatkovaj viersii, pažar pačaŭsia ŭ vyniku parušeńnia techniki biaśpieki pry zvarcy — padčas pracy z adkrytym ahniom.
Rabočyja kambinatu nazyvajuć nastupnyja pryčyny trahiedyi: pieradusim heta
abšyŭka pamiaškańnia pažaraniebiaśpiečnymi płastykavymi panelami, jakija chutka harać, vydzialajučy atrutny smurod. Taksama zhadvajuć, što pracavać davodzicca ŭ začynienych na ŭvieś pracoŭny dzień pamiaškańniach — hetak kiraŭnictva zmahajecca z kradziažami miasa i miasapraduktaŭ.
Supracoŭniki kambinatu ananimna raspaviadajuć, što na druhi dzień paśla pažaru ludzi na pradpryjemstvie traciać prytomnaść: u chaładzilnym cechu zahadana likvidavać smurod, raspylajučy vocat, a indyvidualnyja srodki abarony rabočym nie vydajucca. Jość źviestki, što abharełyja tušy žyvioły, jakija padčas pažaru znachodzilisia ŭ halerei, buduć vykarystanyja dla vytvorčaści kansiervaŭ, u tym liku dziciačaha charčavańnia. Administracyja pahražaje zvalnieńniami ŭsim, chto admaŭlajecca pracavać u takich umovach, i zahadvaje ścierci fota- i videazapisy pažaru na mabilnych telefonach.
Kamientary