Umova vydzialeńnia kredytu – realnaja prahrama ekanamičnych i strukturnych reformaŭ.
Misija Mižnarodnaha valutnaha fondu, jakaja ciapier znachodzicca ŭ Minsku, abmianiajecca z uładami Biełarusi dumkami ab mahčymaści pradastaŭleńnia kredytnaj padtrymki, paviedamiła pastajanny pradstaŭnik MVF u Biełarusi Natalla Kaladzina.
Jana nahadała, što misija fondu, vizit jakoj raniej płanavaŭsia dla praviadzieńnia postprahramnaha manitorynhu, pracuje ŭ Biełarusi ad 1 da 13 červienia. Misija abmiarkuje pytańni ekanamičnaj palityki, jakaja dazvalaje adnavić stabilnaść u ekanomicy i zabiaśpiečyć jaje pierachod da vysokaha i ŭstojlivamu rostu.
"Hetaja misija skarystajecca mahčymaściu, kab abmianiacca z uładami dumkami ab mahčymych nastupnych krokach u adkaz na ich prośbu ab prahramie, jakaja mahła b być padtrymanaja Mižnarodnym valutnym fondam", - padkreśliła Kaladzina.
U pradstaŭnictvie MVF nie kamientujuć zdahadki šerahu ekśpiertaŭ ab tym, što fond moža admović Biełarusi ŭ pradstaŭleńni kredytu pa palityčnych matyvach.
Takoje mierkavańnie, u pryvatnaści, vykazaŭ eks-kiraŭnik Nacbanka Stanisłaŭ Bahdankievič, pa słovach jakoha, uładam nie ŭdasca atrymać kredyt MVF, pakul u Biełarusi buduć praciahvacca palityčnyja represii. Pry hetym Bahdankievič nahadvaje, što asnoŭnyja akcyjaniery fondu -- ZŠA, Jeŭraźviaz, Japonija i Kanada.
Varta taksama adznačyć, što na tym tydni Jeŭrapiejski bank rekanstrukcyi i raźvićcia zajaviŭ ab pierahladzie pryniataj u śniežni 2009 hoda krainavaj stratehii pa Biełarusi, admoviŭšysia ad zapłanavanych prajektaŭ u dziaržaŭnym enierhietyčnym siektary.
Zajaŭku ŭ MVF na pradstaŭleńnie stabilizacyjnaha kredytu ŭrad i Nacbank nakiravali 31 maja. Jak zajaviŭ premjer-ministr Michaił Miaśnikovič, Biełaruś raźličvaje pryciahnuć ad 3,5 da 8 młrd dalaraŭ u ramkach novaj prahramy supracoŭnictva z MVF.
Pa słovach Natalli Kaladzinaj, terminy razhladu zajaŭki pakul nie vyznačany.
U svaju čarhu, u MVF padkreślivajuć:
dla luboj prahramy finansavańnia Biełarusi z boku fondu krainie "nieabchodnaja prahrama mier ekanamičnaj palityki, jakaja realna vyklikaje davier, i ambitnaja prahrama strukturnych reformaŭ".
Nahadajem, u 2009-2010 hadach Biełaruś atrymała piać tranšaŭ kredytu MVF pa prahramie stand-by. Ahulnaja suma srodkaŭ, vydzielenych fondam u ramkach stabilizacyjnaj prahramy, skłała kala 3,46 młrd dalaraŭ.
U Nacbanku zajaŭlali, što prahrama stand-by syhrała "adnu z klučavych rolaŭ u stabilizacyi ekanomiki Biełarusi ŭ 2009 -- pačatku 2010 hoda, dazvoliła padtrymać stabilnaść na valutnym rynku, zabiaśpiečyć vialikuju ŭstojlivaść finansavaj sistemy, padtrymać upeŭnienaść inviestaraŭ i chatnich haspadarak". Adnak paśla zaviaršeńnia prahramy pradstaŭniki ŭłady nieadnarazova zajaŭlali ab adsutnaści nieabchodnaści ŭ realizacyi novaj prahramy stand-by.
Kamientary