Z udzielnikami pratestu na «Varšaŭskim moście» sustreŭsia staršynia Bresckaha abłvykankama
Pratestoŭcy patrabujuć svabodnaha prajezdu aŭtamabilaŭ, kali ŭ bakach budzie nie bolš jak 10, maksimum 15 litraŭ paliva.
Staršynia Bresckaha abłvykankama Kanstancin Sumar sustreŭsia z udzielnikami akcyi pratestu na pahraničnym pierachodzie "Varšaŭski most" pad Brestam.
Sumar pryjechaŭ na pierachod u 19.30, praz 1 hadzinu 20 chvilin paśla taho, jak z prysutnymi pačali dyjałoh kiraŭniki Bresckaj pahraničnaj hrupy Siarhiej Brytaŭ, Bresckaj mytni Leanid Dosaŭ i UUS Bresckaha abłvykankama Uładzimir Syčeŭski.
Udzielniki akcyi pastavili pierad Sumaram pytańnie ab svabodnym prajeździe aŭtamabilaŭ, kali ŭ bakach budzie nie bolš jak 10, maksimum 15 litraŭ paliva.
Čynoŭnik vykazaŭ nadzieju na vyrašeńnie prablem, što ŭźnikli paśla ŭvachodžańnia ŭ siłu pastanovy Savieta ministraŭ ab novym paradku vyvazu ź Biełarusi za miežy Mytnaha sajuza dyzielnaha paliva i šerahu inšych tavaraŭ.
Sumar paviedamiŭ, što budzie infarmavać Minsk ab situacyi na miažy.Pavodle jaho słoŭ, u chutkim časie ŭ stalicy budzie abmiarkoŭvacca pytańnie ab realizacyi hetaha ŭradavaha dakumienta.
Prykładna ŭ 19.50 razmova zaviaršyłasia, prysutnyja razyšlisia. Uvieś hety čas pahranpierachod pracavaŭ u zvyčajnym režymie.
Napiaredadni akcyja pratestu prajšła ŭ punkcie propusku "Bruzhi".Kiroŭcy pierakryli darohu, patrabujučy admianić pastanovu Savieta ministraŭ. Na miesca vyjazdžaŭ staršynia Hrodzienskaha abłvykankama Siamion Šapira. Akcyja zaviaršyłasia zatrymańniem 22 čałaviek. 13 červienia Hrodzienski rajonny sud pačaŭ razhladać administracyjnyja spravy. Zatrymanych štrafujuć na bujnyja sumy.
Z 11 červienia ŭ Biełarusi dziejničajuć abmiežavańni na vyvaz fizičnymi asobami aŭtamabilnaha paliva.Paliva, što vyvozicca bolš jak adzin raz na praciahu piaci sutak za miežy Mytnaha sajuza Biełarusi, Kazachstana i Rasii, abkładajecca ekspartnaj pošlinaj. 12 červienia ŭstanoŭleny zabarona i śpiecyjalny zbor na vyvaz asobnych tavaraŭ za miežy Mytnaha sajuza.
Hetyja rašeńni ŭłady tłumačać nieabchodnaściu abarony spažyvieckaha rynku va ŭmovach kryzisu.
Zabarona na vyvaz tavaraŭ i paliva ŭdaryła pa žycharach zachodnich pryhraničnych rajonaŭ Biełarusi, dla mnohich ź jakich pamiežny handal źjaŭlajecca asnoŭnym srodkam zarobku.
Kamientary