Labiedźku j Dabravolskaha nie prapuścili praź miažu. Novyja śpisy nievyjaznych?
Skazali: «u kampjutary vy ŭ śpisie».
«Kali takoje zdarałasia raniej, byli niejkija farmalnyja pryčyny: kryminalnyja spravy. Ciapier ničoha takoha niama», — raskazaŭ «Našaj Nivie» Anatol Labiedźka.
Staršynia Abjadnanaj hramadzianskaj partyi kiravaŭsia ŭ Litvu praz pamiežny pierachod Kamienny Łoh.Miarkuje, što zabarona na vyjezd źviazana sa stvareńniem uładami novaha śpisu palityčnych nievyjaznych. Infarmacyju pra jaho łukašenkaŭcy źlili ŭ ŚMI tydzień tamu.
Havaryłasia, što vyjezd moža być abmiežavany 108 hramadskim dziejačam i palitykam, jakija, byccam by, «zaklikali da ŭviadzieńnia sankcyj suprać Biełarusi».Jak viadoma, Jeŭrasajuz i ZŠA ŭviali abmiežavalnyja miery suprać łukašenkaŭcaŭ. Zachady ES zvodziacca da zabarony vydačy vizaŭ dla asobaŭ, jakija padazrajucca ŭ saŭdziele ŭ represijach.
Nijakich adznak u pašpart Labiedźku nie pastavili.Adno što pastavili štamp «Anulavana» na kvitočak, ź jakim čałaviek prachodzić pahraničny pierachod.
Pryčynu niapropusku na miažy nie tłumačać. Dla hetaha treba źviartacca ŭ orhany viz i rehistracyi pa miescy žycharstva.
U Labiedźki na siońnia byli zapłanavanyja sustrečy ŭ parłamiencie, MZS Litvy i meryi Vilni. Aprača taho ŭ stalicy Litvy hrupa biełaruskich apazycyjnych palitykaŭ mieła abmierkavać u režymie «biez prasłuški» stratehiju dziejańniaŭ na vosień 2012 hoda.
Kanstytucyjnych padstavaŭ dla abmiežavańnia svabody pieramiaščeńnia asobnych hramadzian niama.Adnak vykazvałasia mierkavańnie, što ŭłady mohuć skarystać dla hetaha novuju normu ŭ zakanadaŭstvie, jakaja daje mahčymaść abmiažoŭvać vyjezd za miažu asobam, jakija znachodziacca ŭ prafiłaktyčnaj raspracoŭcy KDB.
U momant našaha telefanavańnia Labiedźka siadzieŭ u kaviarni kala pamiežnaha pierachodu.
Dziejač pakul nie viedaje, jakim čynam budzie dziejničać dalej ci abskardžvać zabaronu.Jon žartuje, što spačatku źbirajecca «adśviatkavać 8 Sakavika».
I pieradaŭ zyčeńni ŭsim biełaruskim žančynam, «kab Vašy syny i mužy pobač z Vami i kab Vy mahli razam vyjazdžać, kudy zachočacie».
Kali zabarona na vyjezd asobnym hramadzian stanie normaj, heta stanie jašče adnym krokam nazad u pytańni hramadzianskich svabod u Biełarusi. Naša kraina zastajecca adzinaj u Jeŭropie, što nie ŭvachodzić u Radu Jeŭropy, što aznačaje, što
hramadzianie Biełarusi nie majuć mahčymaści asprečvać rašeńni biełaruskich uładaŭ i sudoŭ u niezaležnym Jeŭrapiejskim sudzie pa pravach čałavieka.
Paźniej u sieradu praź miažu nie prapuścili taksama inšaha palityka z AHP — Alaksandra Dabravolskaha.
Kamientary