Zapusk biełaruskaha kaśmičnaha spadarožnika zapłanavany na 7 červienia
Zapusk biełaruskaha kaśmičnaha spadarožnika zapłanavany na 7 červienia, paviedamiła krynica va ŭradzie.
Treba adznačyć, što data zapusku spadarožnika nieadnojčy pieranosiłasia. Tak, naprykład, jaho płanavałasia zapuścić u pieršym kvartale 2011 hoda, zatym razmova išła pra druhi kvartał, zatym nazyvali pieršuju pałovu 2012 hoda.
U śniežni pieršy namieśnik staršyni Nacyjanalnaj akademii navuk Piotr Viciaź, vystupajučy ŭ Saviecie Respubliki, kankretyzavaŭ: start biełaruskaha spadarožnika zapłanavany na kaniec sakavika — pačatak krasavika 2012 hoda. Pavodle jaho słoŭ, spadarožnik dystancyjnaha zandavańnia Ziamli hatovy i prajšoŭ naziemnyja vyprabavańni.
Razam z tym, adznačyŭ Viciaź, rasijski bok zamoviŭ prahramnaje zabieśpiačeńnie ŭ brytanskaj firmie, jakoje dała zboj. "Tamu było pryniata rašeńnie pravieryć usio paŭtorna", — rastłumačyŭ vučony.
Biełaruska-rasijskaje mižuradavaje pahadnieńnie ab supracoŭnictvie ŭ kaśmičnaj śfiery było padpisana ŭ Minsku 15 sakavika 2011 hoda. Płanujecca, što centr kiravańnia palotam biełaruskaha spadarožnika budzie dziejničać u Abjadnanym instytucie prablem infarmatyki (AIPI) NANB. U Pleščanicach (Łahojski rajon, 70 km ad Minska) stvarajecca kamandna-vymiaralny punkt. Zavieršana madernizacyja pryjomnaj anteny na dachu budynka AIPI NANB, jakaja stvarałasia dla pracy sa spadarožnikam "BiełKA". Jaho zapusk letam 2006 hoda z kasmadroma Bajkanur byŭ niaŭdałym. Ciapier antena ŭ stanie prymać infarmacyju ad biełaruskaha spadarožnika i šerahu rasijskich.
Kamientary