Čyju vadu pjuć biełarusy?

Maroziva, soki i vody — najlepšyja prykłady siezonnych praduktaŭ. Prodaž hetych tavaraŭ raście ŭ mai i padaje tolki ŭ vieraśni. Tamu śpiakotny lipień dla vytvorcaŭ — kulminacyja hoda. Na pryłaŭkach pradstaŭlena šmat marak, tamu kupiec maje vybar, kamu z vytvorcaŭ adździačyć rublom. Chto samyja zaŭvažnyja hulcy na rynku vodaŭ?

«Daryda». Zavod — Ždanovičy, Minski rajon

Doŭhija hady lidaram pa prodažach ličyłasia pryvatnaja kampanija «Daryda» na čale z Uładzimiram Dzialendzikam.

Vyšejšuju adukacyju Dzialendzik atrymaŭ tolki ŭ 43 hady, kali skončyŭ sumnieŭnuju filiju Kijeŭskaha dziaržaŭnaha ekanamičnaha ŭniviersiteta ŭ Kryvym Rohu.

Spravy Dzialendzika tym časam išli ŭharu nie tolki ŭ navukovym płanie. Ad 2000 jon na dva terminy abiraŭsia u pałatu pradstaŭnikoŭ, atrymaŭšy deputackuju niedatykalnaść. Pachod biznesoŭcaŭ u palityku vyklikaŭ niezadavolenaść Alaksandra Łukašenki, jaki zajaviŭ, što ŭ parłamiencie pavinny być usie słai hramadstva, aproč kamiersantaŭ. Vyjście była znojdziena, biznes akazaŭsia ŭ rukach siamji.

Dyrektaram «Darydy» stała žonka Hanna Dzialendzik, a zasnavalnikam kampanii — dačka Natalla, jakaja atrymała adukacyju za miažoj. Los syna miljaniera byŭ trahičnym, jon nie dažyŭ da paŭnalećcia.

U 2000-ja abaroty «Darydy» mocna raśli, pradukcyja pajšła na ekpart. U pryvatnaści, u kampanii mocnyja pazicyi ŭ Prybałtycy. Chapała hrošaj i na dabračynnaść — Dzialendzik dapamahaŭ dziciačym damam, muziejam i carkvie, za što atrymaŭ orden Kiryły Turaŭskaha. Aproč taho, miljanier stvaryŭ pryvatny futbolny kłub, jaki praisnavaŭ dzieviać hadoŭ, pryčym ad 2003 da 2008 «Daryda» hulała ŭ vyšejšaj lizie čempijanata Biełarusi. Praŭda, skončyłasia historyja nie pa-spartyŭnamu. Dzialendzik byŭ pierakanany, što Biełaruskaja fiederacyja futboła vyžyvaje jahonuju kamandu z čempijanatu, tamu sudździ naŭmysna prymajuć rašeńni nie na karyść jaho kamandy. U vyniku «Daryda» była raspuščana, a stadyjon u staličnym mikrarajonie Kuncaŭščyna pradadzieny minskamu «Dynama» Juryja Čyža.

Minski zavod biezałkaholnych napojaŭ («Minskaja», «Bieła-Koła», «Multytel»).

Zavod, zasnavany jašče ŭ 1966, byŭ vyviedzieny sa składu dziaržaŭnaha kancerna «Biełdziaržcharčprad». Jahonym kiraŭnikom biazźmienna zastajecca adzin z apošnich «čyrvonych dyrektaraŭ» Anatol Arciuchoŭski. Darečy, syn dyrektara, Dźmitryj uznačalvaje adździeł markietynhu zavoda.

Na pačatku 2012 antymanapolnaje ŭpraŭleńnie Minharvykankama ŭklučyła zavod u śpis kampanij, jakija zajmajuć daminujučaje stanovišča na handlovych rynkach Minska.

Nasupierak svajoj naźvie, zavod nie hrebuje zarablać i na vytvorčaści ałkahola, u tym liku mocnaha — vina, kańjaku, viski… Da niadaŭniaha času kampanija źjaŭlałasia adnym z najbujniejšych vytvorcaŭ słabaałkaholnych džyn-tonikaŭ.

Jak pradpryjemstva nabližanaje da dziaržavy, zavod nie admaŭlajecca i ad padtrymki kałhasaŭ. U sielskahaspadarčaje pradpryjemstva «Vilija-Ahra», pa słovach Arciuchoŭskaha, daviałosia ŭkłaści kala $7 miljonaŭ.

«Koka-koła» (BonAqua, Sprite, Fanta, Schweppes, «Fruktajm»). Zavod — Kaladzičy, Minski rajon.

Adzin z redkich paśpiachovych prykładaŭ pracy suśvietnaj karparacyi ŭ Biełarusi. «Koka-koła» pryjšła ŭ Biełaruś u 1994 jak partnior Minskaha zavoda biezałkaholnych napojaŭ, a praz try hady arhanizavała ŭłasnuju vytvorčaść kala stalicy. Ciapier zavod maje filii va ŭsich abłasnych centrach, Baranavičach i Babrujsku.

Ułaśnikam zavoda źjaŭlajecca kampanija «Koka-koła Bieŭrydžys Biełaruś», jakaja, u svaju čarhu, uvachodzić u hrečaski chołdynh Coca-Cola Hellenic. Hałoŭnamu amierykanskamu ofisu naležyć kala čverci akcyj hrečaskaj kampanii, stolki ž maje miascovy inviestar, a astatnija akcyi znachodziacca ŭ svabodnym zvarocie na biržach.

Dola «Koka-koły» ŭ ekanomicy Biełarusi letaś pašyryłasia za košt kupli smalavickaj kampanii «Vłanpak», jakaja vypuskaje soki i niektary Magic Summer i Rio.

«Frost». Zavod — Chomsk, Drahičynski rajon.

Sumiesnaje rasijska-biełaruskaje pradpryjemstva «Frost i K» vyłučajecca siarod kankurentaŭ svajoj addalenaściu ad Minska — vada raźlivajecca ŭ paleskaj hłušy. Dyrektar kampanii — biznesoviec Uładzimir Maroz. Darečy, «maroz» u pierakładzie na anhlijskuju movu i hučyć jak «frost». Pad hetym brendam i pradajecca ŭsia pradukcyja kampanii. A rekłamnym tvaram «Frosta» źjaŭlajecca śpiavačka Iryna Darafiejeva.

«Akvatrajpł» («Darečy», «Sočy», «Fantana», «Kryničnaja vada»). Zavod — Sosny, Minski rajon.

Składana znajści halinu biełaruskaj ekanomiki, u jakoj nie pradstaŭleny Juryj Čyž. Vody i napoi — nie vyklučeńnie. Zrešty, mienavita haziroŭka była adnym ź pieršych prajektaŭ miljaniera. Naftapierapracoŭka i budaŭnictva pryjšli ŭ žyćcio Čyža značna paźniej, ale stali pryjarytetnymi. Tamu «Akvatrajpł» i adstaje ad čaćviorki lidaraŭ.

Aproč vytvorčaści biezałkaholnych napojaŭ, kampanija Juryja Čyža ŭvozić ałkahol z-za miažy, majučy status śpiecimparciora.

• 0
• 0
• 0
• 0
• 0
• 0
• 0
• 0