Pradstaŭniki biełaruskaj itelihiencyi — narodnyja paety, piśmieńniki, historyki i litaraturaznaŭcy, a taksama lidery ŭsich palityčnych partyjaŭ źviarnulisia da hramadzkaści z zaklikam 30 traŭnia ŭ 14 hadzinaŭ pryjści ŭ Saviecki sud na Łahojski trakt, 3 i padtrymać maładafrontaŭcaŭ.
 |
MAŁADY FRONT NIE SPYNIĆ!
U Miensku iznoŭ sudziać maładafrontaŭcaŭ.
Režym, ustalavany ŭ Biełarusi, praciahvaje žorstka pieraśledavać biełarusaŭ, jakija chočuć žyć u volnaj, demakratyčnaj, niezaležnaj krainie. Paśla letašnich padziejaŭ, kali dziasiatki tysiačaŭ hramadzianaŭ, pieravažna maładych, vyjšli baranić svabodu, praŭdu i spraviadlivaść na Płošču Kalinoŭskaha, asnoŭny ŭdar represijaŭ uładnaja mašyna skiravała suprać biełaruskaj moładzi. Nia majučy ŭ čym abvinavacić udzielnikaŭ niehvałtoŭnaha supracivu, KDB uvioŭ u kryminalny kodeks antykanstytucyjny artykuł 193 — «udzieł u dziejnaści niezarehistravanaj arhanizacyi». Jak u 1937‑ym stalinskija katy sudzili pa «spravie nacdemaŭ» biełaruskich paetaŭ i piśmieńnikaŭ, a praź dziesiacihodździe — maładych zmaharoŭ pa «spravie Sajuzu Biełaruskich patryjotaŭ», tak i ciapier, u 2007‑m, idejnyja naščadki NKVD‑OHPU rychtujuć raspravu nad siabrami Maładoha Frontu.
Adrazu paśla viasnovych padziejaŭ 2006h. režym raspačaŭ kryminalnuju spravu suprać Maładoha Frontu: dopyty achapili bolš 100 aktyvistaŭ pa ŭsioj krainie. U adkaz na heta 80 maładafrontaŭcaŭ praviali estafetnuju haładoŭku pratestu.
Letaś 15 vieraśnia byŭ kinuty za kraty lider Maładoha Frontu Źmicier Daškievič, jaki atrymaŭ pavodle «193 artykułu» paŭtara hady turmy. Praź miesiac schapili j abvinavacili ŭ zabojstvach, zhvałtavańni j teraryźmie jahonaha namieśnika Paŭła Krasoŭskaha. Bolš hoda adbyvaje «chimiju» zasudžany za palityčnyja hrafici adzin ź lideraŭ Maładoha Frontu Artur Fińkievič. 4 lutaha hetaha hodu 30 kiraŭnikoŭ Maładoha Frontu byli zatrymanyja ŭ Miensku, piaciora ź ich — Źmicier Chviedaruk, Barys Harecki, Alaksiej Janušeŭski, Aleh Korban j Nasta Pałažanka — ciapier abvinavačvajucca pavodle taho ž drakonaŭskaha 193‑ha artykułu.
Zaraz ža čakaje suda moładzievy aktyvist Dzianis Dzianisaŭ, biespadstaŭna abvinavačany ŭ «arhanizacyi biesparadkaŭ». Kryścinu Šacikavu, jakaja na znak salidarnaści dałučyłasia da Maładoha Frontu, nieviadomyja prymusova zavieźli ŭ varjatniu.
Ale, niahledziačy na heta, Małady Front praciahvaje zmahańnie za Biełaruś. Tysiačy maładych biełarusaŭ vyjšli na staličnyja vulicy ŭ Dzień Voli 25 sakavika. Maładafrontaŭcy poŭnyja rašučaści i najdalej dziejničajuć adkryta j abviaščajuć: MAŁADY FRONT NIE SPYNIĆ!
Represii suprać Maładoha Frontu pierakanaŭča davodziać — režym panična baicca voli j viery biełaruskaj moładzi. My viedajem, što Małady Front hruntuje svaju dziejnaść na biełaruskim patryjatyźmie i chryścijanskich pryncypach, i padtrymlivajem maładafrontaŭcaŭ u ichnim zmahańni za demakratyju i adradžeńnie.
My zaklikajem usich biełarusaŭ 30 traŭnia ŭ 14:00 pryjści na sud nad maładafrontaŭcami Źmitrom Chviedarukom, Barysam Hareckim, Alaksiejem Janušeŭskim, Aleham Korbanam j Nastaj Pałažankaj, kab vykazać im rašučuju salidarnaść i skazać razam ź imi:
MAŁADY FRONT NIE SPYNIĆ!
Kamientary