afsajd
Pabačyć mundyjal!
Šok pamału syšoŭ, ale zastajecca dyskamfort. Balšynia z nas pa-raniejšamu adłučanaja ad turniru, supastaŭnaha, kali ŭziać pad uvahu cikavaść da jaho ŭ cełym śviecie, chiba ź letniaj Alimpijadaju. Prapuściŭšy biezuvažna kolkirazovyja prapanovy “Kirch-media” — uładalnika pravoŭ na tranślacyi ź Japonii j Paŭdniovaj Karei, pahareŭšy minułaje piatnicy na piractvie, Biełaruskaja televizija ratuje sytuacyju. Zamiest taho kab sačyć futboł, my sočym, jak BT viadzie zapoźnienyja pieramovy z kancernam Leo Kircha. Spačatku havorka jdzie pra 470 tysiač dalaraŭ, tady — pra 320. Pry hetym čempijanat nam deklarujuć pakazvać z 15 červienia — z płej-ofaŭ, to bo 16 matčaŭ z 64. Dyskamfort projdzie, ale prosiać pačakać — jašče dzion tak dziesiać…
Alternatyvaju čakańniu — spadarožnikavaja televizija, ale j tut nia ŭsio prosta. Padtočany bankructvam Leo Kirch skrupulozna dapilnoŭvaje svaich intaresaŭ. Za prava tranślavać sioletni i 2006-ha hodu čempijanaty śvietu jahony kancern zapłaciŭ miljard 750 miljonaŭ dalaraŭ.
Jak vynik, matčy mundyjalu niedastupnyja na adkrytych ličbavych kanałach; futboł biaz kartki dapamoža pahladzieć adno analahavy tuner (skažam, na niamieckich ARD i ZDF abo — z skažeńniem videasyhnału — na italjanskich RAI). Kalasalny popyt ciapier na ličbavy pakiet NTV+: siarod jaho kanałaŭ jość futbolny, dzie žyŭcom i ŭ zapisie — kožnaja hulnia ź Japonii j Karei. U adpaviednaści z pravami NTV+ na pakaz čempijanatu, prahlad hetaha kanału lehalny tolki na terytoryi Rasiei, adnak u Biełarusi prablemu “zdymajuć” napaŭlehalnyja abo ŭvohule pirackija kartki. Zmahacca z indyvidualnym piractvam “Kirch-media”, naturalna, nia budzie. Zrešty, niamiecki kancern papuściŭ dniami ŭ vypadku niezakonnych pakazaŭ na terytoryi cełaj krainy. Daznaŭšysia pra tranślacyi matčaŭ u Paŭnočnaj Karei, pradstaŭniki “Kirch-media” zajavili, što nie źbirajucca pravavacca z tamtejšaj televizijaj. “Treba radavacca, što siła Kubku śvietu razburaje ŭsialakija barjery”, — zaznačyŭ pres-sakratar kancernu.
Tym časam na futbolnych paloch praciahvajucca matčy druhoha turu hrupavych zmahańniaŭ. U pieršym bukmejkierskija favaryty zbolšaha apraŭdali davier. Za vyniatkam Francyi — jaje niepierakanaŭčyja kandycyi ŭ sustrečy z Senehałam imhnienna adbilisia na staŭkach. Tradycyjna najpilniejšaja ŭvaha na hulniu čatyrochrazovych čempijonaŭ śvietu brazylcaŭ — da pieramohi hetaj kamandy indyvidualnaściaŭ nad turkami ładna pryčyniŭsia paŭdniovakarejski sudździa, pryznačyŭšy penalci za parušeńnie, učynienaje pa-za štrafnoj placoŭkaj. Tureckuju zbornuju, darma što pačała z parazy, ryzyknu nazvać najbolš perspektyŭnym navičkom mundyjalu, zdatnym pajści ŭ ślady ŭčyńnikaŭ sensacyjaŭ na čempijanatach 1994 i 1998 hadoŭ — zbornych Baŭharyi j Charvatyi. Prynieśli i, zdajecca, padniasuć jašče haściom kłopatu haspadary — kamandy Paŭdniovaj Karei j Japonii. Pieršyja ci nia ŭ kožnym z kampanentaŭ futbołu pierahulali palakaŭ, kolišnich supiernikaŭ zbornaj Biełarusi ŭ zmahańni za miesca na mundyjali. Zaciataja, da apošniaha matču, baraćba za vychad u płej-ofy čakajecca ŭ balšyni hrupaŭ. Tolki chaciełasia b nie pračytać pra heta, a pabačyć.
Juraś Bušlakoŭ
cłova tydnia
Mundyjal
ad mundial (hišp.) — suśvietny. U zaležnaści ad kantekstu ŭžyvajecca da mižnarodnych padziejaŭ, festaŭ, hulniaŭ, vystavaŭ. Paśla Čempijanatu śvietu 1990 h. u Meksycy, pad łacinaamerykanskim upłyvam aznačeńnie tryvała zamacavałasia za futbolnym čempijanatam śvietu.
Kamientary