Erotyka i rycary — novyja “razynki” BT
21 vieraśnia Pieršy nacyjanalny telekanał raspačnie novy sezon. Kala Pałacu sportu ŭ Miensku z hetaj nahody navat adbudziecca śviata (pačatak a 13-j). Ź ciažkaściu vierycca, što da stvareńnia novych prahramaŭ pryviało źjaŭleńnie telekanału ANT. Asnoŭnym kankurentam dla BT pa-raniejšamu zastajucca rasiejskija telekanały, bieskantrolny dopusk jakich u Biełaruś ciaham apošnich hadoŭ pryvioŭ da taho, što praktyčna nie finansavanuju Biełaruskuju televiziju mała chto hladzieŭ. Pieraabstalavańnie studyjaŭ dy płojma novych, chaj sabie j małabiudžetnych, prahramaŭ moža śviedčyć pra realnaje žadańnie kiraŭnictva pieratvaryć narešcie kanał z čysta idealahičnaha infarmatara ŭ telebačańnie svajoj krainy.
Najpierš zaznała źmienaŭ studyja Ahienctva telenavinaŭ. Jano zajmieła spadarožnikavuju pierasoŭnuju telestancyju. Ciapier nie daviadziecca hladzieć siužet ź jakoha Lepielskaha rajonu i bačyć zamiž “karcinki” zdymak karespandenta. Aproč taho, studyja ATN budzie azdablacca z dapamohaj unikalnaha abstalavańnia, “chałodnaha śviatła”. Promni hetaj aparatury dazvolać madelavać interjer, praktyčna nie vykarystoŭvajučy dekaracyjaŭ. U vialikaj (600 kv.m) studyi BT taksama pastavili novaje aśviatlalnaje abstalavańnie, kab paźbiehnuć vialikich i hruvastkich dekaracyjaŭ. Heta dapamoža chutka rychtavać studyju da roznych prahramaŭ.
“Panarama” pamienieje
Źmieny buduć nia tolki vonkavymi i techničnymi. Infarmacyjnaja štodzionnaja “Panarama” skarocicca z 45 da 35 chvilinaŭ i na manier blokaŭ navinaŭ RTR budzie davać 10-chvilinny dadatak ź miascovymi navinami. Žychary kožnaj vobłaści zmohuć hladzieć naviny svajho rehijonu. Infantylnyja naviny telekanału STV atrymajuć, takim čynam, u asobie Pieršaha nacyjanalnaha mocnaha kankurenta. Źjavicca j niadzielnaja “infarmacyjna-analityčnaja prahrama novaha typu”, na jakuju, vidać, laža asnoŭnaja adkaznaść za praviadzieńnie ŭ masy dziaržaŭnaje idealohii. Prynamsi, žurnalisty ATN užo rychtujuć “Vialiki repartaž” — seryju filmaŭ pra žyćcio ŭ postsavieckich krainach, jakaja musić prademanstravać nam pieravahi “biełaruskaha šlachu”.
“Padarožžy” i “Turniry”
Ciešyć, što na Pieršym nacyjanalnym pabolšała pieradačaŭ na histaryčnuju tematyku: “Śviatyni Biełarusi”, “Padarožža dyletanta”, “Cieni i fihury” (cykł pryśviačajecca małaviadomym faktam ź bijahrafijaŭ Janki Kupały i Jakuba Kołasa). A “razynkaj” histaryčnaha naboru musić stać paznavalnaja hulnia “Turnir” — analah viadomaj francuskaj “Fort Bajard”. Dyrektar zabaŭlalnaha viaščańnia Pieršaha nacyjanalnaha Ŭładzimier Maksimkaŭ raspavioŭ “NN”, što prahramu televizijniki rychtavali z dapamohaj rycarskich klubaŭ Biełarusi. Pieršyja try hulni projduć u Mirskim zamku, i ŭdzielniki ŭ ich užo nabranyja. Nadalej pasprabavać svaje siły zmoža kožny achvotny: ani viek spabornika, ani poł, ani adukacyja značeńnia nia majuć. “My nie źbirajemsia abmiažoŭvacca Mirskim zamkam”, — zaznačyŭ U.Maksimkaŭ. Aproč vyprabavańniaŭ na sprytnaść, siłu, tryvałaść, u prahramie buduć i pytańni na viedańnie biełaruskaj historyi, na kiemlivaść. Pryzy ŭ “Turniry” miarkujucca “niehrašovyja”. U.Maksimkaŭ ličyć, što mieč — značna lepšy pryz, čym hrošy. Praŭda, biełaruskaj movy ŭ prahramie budzie mizer: pa-biełarusku prahučyć histaryčnaja daviedka pra miaścinu, dzie adbyvajecca hulnia. Pracoŭnaj movaj prahramy budzie rasiejskaja.
Lohkaja erotyka
Kolki tydniaŭ tamu BT pierakryła načny eter rasiejskim telekanałam. Ciapier vyśvietliłasia, što heta była preludyja da vychadu ŭ načny eter samoj Biełaruskaj televizii. Jon pačniecca z 24 vieraśnia.
Pieršy nacyjanalny miarkuje zajmać 5 načej na tydzień. “Volnymi” zastalisia nočy ź niadzieli na paniadziełak i z paniadziełka na aŭtorak. Pieradačy dla tych, chto nia śpić, buduć zhrupavanyja pavodle tematyki. Vychodzić jany musiać nie ŭ žyvym etery, a ŭ zapisie.
Aŭtorkavaja noč atrymała ŭmoŭnuju nazvu “Mužčynskaja biessań”, sieradovaja — “Dziońnik žančyny”, čaćviarhovaja — “Zornaja noč” (prahramy pra šoŭ-biznes), piatničnaja — “Načnaja razmova” z Alaksandram Damarackim (z “žyvoj” muzykaj), subotniaja — “Prosta muzyka”.
Viestka, jakoj ciažka było napačatku dać viery, — najaŭnaść erotyki na BT. U.Maksimkaŭ kaža, što jana budzie “pa-sapraŭdnamu lohkaj i pryhožaj” i źjavicca ŭ etery ŭ čas, kali jaje budzie hladzieć tolki darosłaja aŭdytoryja. Samaje pikantnaje, što Pieršy nacyjanalny abiacaje pakazvać erotyku, źniatuju ŭłasnymi siłami. Chto i dzie budzie zdymać — pakul tajamnica.
Bieź piractva
BT naahuł ździŭlaje šmat čym. Voś, u pryvatnaści, abiacajuć spynić “piractva” i pakazvać hledačam tolki licenzijnuju pradukcyju. Paśla hučnych skandałaŭ z pakazam futbolnych matčaŭ čempijanatu śvietu dy filmaŭ Kusturycy hetaje abiacańnie hučyć duža nadzionna.
Ci jość pahroza taho, što hledačam ciapier daviadziecca abmiežavacca starymi savieckimi kinafilmami i spartovymi matčami tolki biełaruskich kamandaŭ? Hałoŭny redaktar adździełu licenzavańnia Łarysa Pisarčyk ćvierdzić, što telekanał zakupiŭ pakiet filmaŭ Hičkoka, sioletnija oskaraŭskija premjery “Ajrys” i “Ali”.
Prablema ź licenzijnymi pakazami dniami znoŭ stałasia aktualnaj — pačalisia matčy hrupavoj fazy futbolnaj Lihi čempijonaŭ. Tranślujucca jany pa NTV apoŭnačy, kali hety telekanał, jak i inšyja rasiejskija, u Biełarusi nie tranślujecca. Ci nie apynucca biełaruskija zaŭziatary ŭ toj samaj sytuacyi, u jakoj jany ŭžo byli ŭ červieni, kali pačaŭsia čempijanat śvietu? Vykanaŭca abaviazkaŭ hałoŭnaha redaktara spartovych prahramaŭ Taciana Padbiareskaja, kamentujučy sytuacyju dla “NN”, zaznačyła: “Navat kali rasiejskija telekanały kuplajuć prava pakazu, pravaŭładalniki ahavorvajuć terytoryju, na jakoj možna pakazvać. Tamu rasiejskija telekanały buduć abaviazanyja pierakryvać pakaz matčaŭ na terytoryju Biełarusi. Biełaruskaja televizija pakul viadzie pieramovy z pravaŭładalnikami. Pytańnie zastajecca adkrytym”.
Arkadź Šanski
Kamientary