Ukrainski prezydent Leanid Kučma 9 śniežnia pavioz u Maskvu svajho novaha premjer-ministra Viktara Janukoviča. Aficyjnaja nahoda dla vizytu — padpisańnie dakumentaŭ nakont tranzytu rasiejskaha hazu praz Ukrainu i zakryćcio Hodu Ŭkrainy ŭ Vialikim teatry.
Heta ŭžo vośmy vizyt Kučmy ŭ Rasieju za hety hod. Rekordy A.Łukašenki pa naviedvańni Maskvy pabityja.
V.Janukoviča, byłoha kiraŭnika Danieckaj vobłaści, nazyvajuć pierajemnikam Kučmy na prezydenckich vybarach, jakija adbuducca va Ŭkrainie praz dva hady. Jon z Daniecku, pa-ŭkrainsku havoryć kiepska, u Zachodniaj Ukrainie maje reputacyju “maskala”. Samaje cikavaje ŭ jahonaj bijahrafii — sudzimaści, jakija jon mieŭ u maładości. Praŭda, u 90-ja hady jon staŭ nia tolki hubernataram, ale šče j akademikam.
Kabinet ministraŭ, uznačaleny V.Janukovičam, — pieršy ad 1991 h., u jakim niama nivodnaha ministra, što naradziŭsia b na zachad ad raki Zbruč. Novy premjer adrazu paśla svajho abrańnia abviaściŭ, što jahonaja meta — jak maha ščylniejšaje supracoŭnictva z Rasiejaj “na ŭzajemavyhadnych umovach”.
V.Janukovič robić uražańnie čałavieka, jaki što ŭ ruki zachapiŭ, taho ŭžo nie addaść. Pieramahać jon umieje, pryčym roznymi šlachami. Parlamenckija vybary na Danieččynie vyjhraŭ uradavy blok “Za adzinuju Ŭkrainu”, chacia ŭ cełym u krainie jon zdabyŭ mienš za 10% hałasoŭ. Možna tolki zdahadvacca, jakimi šlachami. Janukovič taksama ciesna źviazany z danieckimi biznes-kłanami i tamtejšym aliharcham Rynatam Achmietavym, uładalnikam pramysłovych pradpryjemstvaŭ, bankaŭ i navat futbolnaj kamandy “Šachcior”.
“Łukašenkaŭ” šlach daje dyvidendy ŭkrainskim aliharcham, jakija hrejuć ruki na lehalnym i nielehalnym biznesie z Rasiejaj i tranzycie. Adnak heta nie dapamahaje Ŭkrainie vyrašyć ekanamičnyja prablemy. Rasieja siońnia kirujecca prahmatyčnymi matyvami, i słovy pra “braterstva narodaŭ” jaje nia hrejuć.
Praz Ukrainu Rasieja transpartuje ŭ Zachodniuju Eŭropu 2/3 svajho hazu. U kastryčniku pad ciskam Uładzimiera Pucina byŭ stvorany rasiejska-ŭkrainski kansorcyjum, što kantraluje tranzyt hazu na Zachad — darma što raniej Kijeŭ ličyŭ hetyja trubapravody svaim kozyram u pieramovach z Maskvoj. Siońnia Rasieja maje ŭ tym kansorcyjumie amal 50% akcyjaŭ.
Nastupny hod va Ŭkrainie abvieščany Hodam Rasiei. Adnak Kijeŭ i Maskva pa-raniejšamu zastajucca kankurentami — jak u handli na terytoryi byłoha Savieckaha Sajuzu, tak i na rynkach Afryki dy Azii.
Mikoła Buhaj
Kamientary