У канцы 2017 года кампанія Xiaomi заявіла, што выйшла на першае месца па колькасці прададзеных смартфонаў у Беларусі. Між тым беларускамоўны інтэрфейс прыладамі кампаніі доўгі час не падтрымліваўся. Нядаўна ўсё змянілася.
Усе мабільныя тэлефоны кампаніі Xiaomi працуюць на аперацыйнай сістэме Android, выкарыстоўваючы фірмовую абалонку MIUI — моцна перапрацаваную версію карыстальніцкага асяроддзя, што найбольш адлюстроўваецца на дызайне сістэмы і некаторых прынцыпах кіравання прыладай.
Доўгі час MIUI не мела беларускамоўнага інтэрфейсу. У пачатку 2018 года «Нашай Ніве» стала вядома, што група энтузіястаў якраз займаецца перакладам, каб вырашыць гэтую праблему.
Мінскі праграміст Максім Якушкін, адзін з удзельнікаў перакладу, распавёў нам тады, што пасля Новага году працэс моцна замарудзіўся.
«Увогуле ў якасці перакладчыкаў зарэгістраваліся каля 15 чалавек. Але праблема ў тым, што з іх актыўна перакладаюць толькі 2—3 чалавекі, — казаў Максім. — Наш прагрэс за тыя два месяцы, як я далучыўся, падрос на 22% і цяпер складае каля 50%. Але на час калядных святаў праца над перакладам крыху прыпынілася, і мне сумна, што працэс рухаецца так павольна».
У сваім матэрыяле мы распавялі, якім чынам можна дапамагчы праекту, і, як кажа Максім, цягам наступных некалькіх дзён з'явілася шмат новых актывістаў, і пераклад паскакаў.
Прайшло крыху больш за два месяцы. З намі звязаўся Максім Якушкін і паведаміў, што для смартфонаў Xiaomi, якія працуюць на АС Anroid 7 і Android 8, з'явілася беларуская мова (у прашыўках MIUI версіі 8.3.8 і 8.3.15, якія выйшлі 09 і 16 сакавіка адпаведна).
Яе цяпер падтрымлівае інтэрфейс, а вось убудаваныя дадаткі — пакуль не. Дапамагчы працягнуць беларусізацыю MIUI могуць усе ахвотныя тут. Свайго перакладу чакаюць яшчэ больш за 40 тысяч фраз.
Актывісты займаліся гэтай справай абсалютна бясплатна, у вольны час. Таму для іх стала нечаканасцю навіна, што кампанія абрала 50 перакладчыкаў на розныя мовы з усяго свету, якія пераклалі больш за ўсё фраз, і ўзнагародзіла іх каштоўнымі падарункамі. Так, беларус Аляксандр Новікаў заняў другое месца (пераклаў больш за 50 тысяч фраз), а Зміцер Горбач і Максім Якушкін падзялілі трэцяе (кожны пераклаў ад 9 да 45 тысяч фраз).
Сейчас читают
«Я в колонии был более свободен». Бывший политзаключенный Тамаз Пипия рассказал о 6 годах за решеткой и новой параноидальной белорусской реальности1212
Комментарии