Урад Чэхіі ў сераду, 8 красавіка, разгледзіць пытанне аб фінансаванні паездкі прэзідэнта краіны Мілаша Зэмана ў Маскву на ўрачыстасці з нагоды 70-годдзя перамогі ў Вялікай Айчыннай вайне.
Пра гэта, як піша выданне Denik, падчас прэс-канферэнцыі заявіў віцэ-прэм'ер Павел Белабрадэк, які таксама з'яўляецца лідарам Хрысціянска-дэмакратычнага саюза — Чэхаславацкай народнай партыі (уваходзіць у кіроўную кааліцыю).
Белабрадэк растлумачыў, што ён не мае нічога супраць таго, каб кіраўнік дзяржавы ўшанаваў памяць загінулых падчас Другой сусветнай вайны. Аднак удзел Зэмана ў вайсковым парадзе ў Маскве, на яго думку, з'яўляецца «непрыстойным у бягучай міжнароднай сітуацыі».
Пакуль незразумела, ці будзе Зэман прысутнічаць 9 мая на Краснай плошчы. Але калі ўрад яго візіт у канчатковым выніку не ўхваліць, то прэзідэнт будзе вымушаны самастойна аплаціць сваю паездку.
Каментары