Мінабароны Літвы: Расійская ваенная база ў Беларусі пашкодзіць нармалізацыі адносін Мінска з НАТА і ЕС
Зьяўленьне расейскай вайсковай базы ў Беларусі пагоршыць адносіны гэтай краіны зь Літвой і перашкодзіць нармалізацыі адносінаў Беларусі з НАТО і Эўразьвязам. Пра гэта заявіў міністар абароны Літвы Юозас Олекас.
«Не падлягае сумневу, што зьяўленьне новай расейскай вайсковай базы на тэрыторыі Беларусі небясьпечнае дадатковай напружанасьцю ў нашым рэгіёне і нэгатыўным уплывам на літоўска-беларускія адносіны. Гэта таксама перашкодзіць імкненьню Беларусі нармалізаваць адносіны з ЭЗ і НАТО», — цытуе Інтэрфакс заяву Олекаса 21 верасьня.
Так кіраўнік Мінабароны Літвы пракамэнтаваў указаньне прэзыдэнта РФ Уладзімера Пуціна міністэрствам абароны і замежных спраў РФ правесьці перамовы зь Беларусьсю аб стварэньні базы ВПС.
Олекас таксама зьвярнуў увагу на тое, што Менск пакуль не апублікаваў сваю пазыцыю па гэтым пытаньні.
Пасьля сустрэчы ў Сочы на мінулым тыдні з кіраўніком Беларусі Аляксандрам Лукашэнкам Пуцін даў распараджэньне абароннаму ведамству РФ правесьці разам з МЗС перамовы зь беларускімі калегамі пра заснаваньне базы ВПС.
Расея ўжо мае аб’ект радыёлякацыі і камунікацыі ВМФ у Беларусі — краіне, якая мяжуе з краінамі-чальцамі НАТО Літвой, Латвіяй і Польшчай, а таксама з Украінай. Заплянаваны ж аб’ект можа стаць першай расейскай вайсковай базай на беларускай тэрыторыі.
Цяпер чытаюць
У турме памёр былы супрацоўнік КДБ Мікалай Варапай, асуджаны за шпіянаж на карысць Украіны3
Каментары