У Менску працягваецца тыдзень ізраільскага кіно, а амбасадар гэтай краіны расказаў карэспандэнту «НН» пра новыя пляны.
19 траўня ў кінатэатры “Перамога” адбылося ўрачыстае адкрыцьцё тыдня “Новага ізраільскага кіно”. Амбасадар Ізраілю Зэеў Бэн Ар’е цёпла павіншаваў прысутных. Сярод гледачоў былі заўважныя Мікалай Кірычэнка і Ўладзімір Арлоў, Алег Трусаў – і Лявон Баршчэўскі, Леанід Дранько-Майсюк.
Надзвычайны і Паўнамоцны пасол Ізраілю ласкава згадзіўся адказаць на нашы пытаньні:
Наша Ніва.: Шаноўны спадар амбасадар, чаму праграма называецца “Новае Ізраільскае кіно”?
Амбасадар: Таму што старога ізраільскага кіно няма.
НН.: Чаму?
Зэеў Бэн-Ар’е: У нас былі песьні, тэатар, танцы – выдатныя традыцыі. Але кіно не было. Так, здымалі, але збольшага гэта былі аматарскія здымкі. Новае ізраільскае кіно зьявілася дзесяць гадоў таму. Яно заслужыла міжнародныя прызы, атрымала папулярнасьць у сьвеце.
НН.: У чым актуальнасьць прадстаўленых фільмаў?
Зэеў Бэн-Ар’е: Найперш, гэта добрае кіно. А, па-другое, гэта вельмі ізраільскае кіно. Яно магло быць зьнятае толькі ў Ізраілі. Карціна “Зоркі Шломі” – лёгкая, сьветлая, жыцьцесьцьвярджальная пра хлопчыка, якога лічаць неразумным, але ён таленавіты і клапоціцца пра сям’ю. Другі фільм – псыхалягічная, амаль псыхіятрычная драма пра дачку і бацьку. Але, хаця настрой стужкі супрацьлеглы – гэта таксама вельмі добрае кіно.
І дзьве дакумэнтальныя карціны. Пра тэрарыстычны акт і загіблага, і фільм пра сям’ю, калі ізраільская жанчына едзе да бацькі ў Расею.
НН.: Што новага нам яшчэ чакаць?
Зэеў Бэн-Ар’е: Цяпер мы сьвяткавалі 60-годзьдзе дзяржавы Ізраіль. Беларускі рок-гурт “J-Mors” выступіў у клюбе “Бронкс”. А неўзабаве будзе падрыхтаваная кніга ізраільскіх апавяданьняў у перакладзе на беларускую мову добра знаёмага чытачам вашай газэты Паўла Касьцюкевіча. Яна ўжо зробленая на 75%, ідзе ўзгадненьне аўтарскіх правоў. Кніга выйдзе ў выдавецтве “Логвінаў”, дзе раней надрукавалі “Кіроўцу аўтобуса, які хацеў стаць Богам” Этгара Керэта ў перакладзе таго ж Касьцюкевіча.
Цяпер чытаюць
20‑гадовую дзяўчыну з аграгарадка Макраны на мяжы з Украінай асудзілі за Гаюна5
20‑гадовую дзяўчыну з аграгарадка Макраны на мяжы з Украінай асудзілі за Гаюна
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі1818
Каментары