У Чачэрску 22-гадовы хлопец пабіў двух 42-гадовых мужчын, таму што «не падзялілі» дзяўчат
Двое 42-гадовых мужчын звярнуліся па дапамогу да міліцыянераў побач з кінаканцэртным комплексам «Кастрычнік» у Чачэрску, на дыскатэцы. Паводле іх слоў, на іх напаў хлопец, які адным ударам у галаву «вырубіў» аднаго з сяброў, другому нанёс удар прадметам, падобным да бейсбольнай біты.
Як высветлілі сілавікі, напад быў хоць і нечаканым, але не выпадковым. Незадоўга да гэтага мужчыны пасварыліся з 22-гадовым хлопцам з-за дзяўчат. Той абвінаваціў іх у тым, што яны прысталі да «яго» дам і тым самым вельмі абразілі. Пасля сваркі мужчына адышоў, аднак праз некалькі хвілін напаў на апанентаў ззаду.
У выніку ў абодвух пацярпелых дыягнаставалі траўмы, якія, зрэшты, не прывялі да шпіталізацыі. А вось раўнівы жыхар Чачэрска можа «прысесці» на тэрмін да дзесяці гадоў — на яго завялі справу па частцы 3 артыкула 339 КК Рэспублікі Беларусь (асабліва злоснае хуліганства). Сам ён віну сваю прызнаў.
Цяпер міліцыянеры галоўным чынам шукаюць прыладу злачынства — той самы дзіўны прадмет, падобны да біты.
Каментары