Лукашэнка: мы асуджаны жыць разам з Расіяй!
Беларускі кіраўнік параіў піцерскаму госцю плюнуць у твар таму, хто кажа, што «ў Беларусі намеціліся нейкія тэндэнцыі ў бок ад Расіі». Піша ў сваім блогу Аляксандар Класкоўскі.
Чаканы рэверанс: сёння на сустрэчы з губернатарам Ленінградскай вобласці Валерыем Сердзюковым Лукашэнка запэўніў, што «будучыні без Расіі мы не бачым, мы асуджаны жыць разам з Расіяй».
Гэта адбылося праз лічаныя дні пасля таго, як у Светлагорску ён вербальна адбамбіўся па Маскве. І, як памятаеце, забараніў сваім чыноўнікам поўзаць на каленях па расійскіх кабінетах.
Традыцыйная тактыка ківача у дзеянні. Трэба змікшаваць папярэднія выпады, выліць порцыю бальзаму на душы расійцаў.
Зрэшты, нават цягам гутаркі з Сердзюковым гаспадар кабінета спрытна спалучаў клятвы ў адданасці Расіі з колкімі рэмаркамі. Сутнасць прэтэнзій у тым, што вялікая суседка не спяшаецца дапамагаць сінявокай рэспубліцы падчас крызісу. Дык жа так, маўляў, нядоўга і страціць хаўрусніцтва...
Дарэчы, на сёння ў Лукашэнкі запланавана яшчэ і сустрэча з сакратаром Рады бяспекі Расіі Мікалаем Патрушавым. Імаверна, будзе чарговая порцыя бальзаму дзеля балансу.
А напярэдадні вайскоўцы рэкламавалі запланаваныя на восень шырокамаштабныя супольныя манеўры. Падчас крызісу будуць выстрэльваць мільёны долараў у белы свет як у капейку, трэніруючыся адбіваць імаверную агрэсію супраць саюзнай дзяржавы. Таксама бальзам на душу маскоўскім вялікадзяржаўнікам.
Між тым беларускі бок разлічвае паймець канкрэтныя выгады ад вайсковай кааперацыі, у прыватнасці задарма ці танна атрымаць зенітна-ракетныя комплексы С-400.
А вось дэ-факта саступаць кантроль над супрацьпаветранай абаронай ці пасылаць салдат у гарачыя пункты згодна з дамовай пра калектыўныя сілы аператыўнага рэагавання Мінск, будзьце ўпэўнены, не разгоніцца. У Крамлі пра гэта, бадай, здагадваюцца. Аднак робяць выгляд, што ўсё на поўным сур'ёзе.
Расія хоць і выглядае грозна, але часта, як вялікае дзіця, задавальняецца цацанкамі. Атрымаўшы вербальную поўху, неўзабаве ўжо зноў цешыцца салодкай рыторыкай пра міфічнае братэрства. Што і трэба беларускаму боку для балансавання ў замежнай палітыцы.
P.S. З выказванняў Лукашэнкі можна зрабіць выснову, што Мядзведзеў па тэлефоне асабіста высвятляў у яго, чаму адсеклі расійскія каналы («Мы дамовіліся з прэзідэнтам Расіі, што кіраўнікі адміністрацый дакладна ўрэгулююць гэтыя пытанні»).
Сёння беларускі кіраўнік, відаць, паўтараючы тэзы, даводзіў Сердзюкову, што праблема высмактана з пальца. Але потым, як гэта часта бывае, не ўтрымаўся,
выліў крыўду: маўляў, «Беларусь наогул не прадстаўлена ў медыйнай прасторы Расіі». І ўдакладніў: «А калі і прадстаўлена, то прэзідэнт — ідыёт і дзеці ў яго ненармальныя, жулікі ды прайдзісветы».
P.P.S. І самая свежая навіна: заўтра Лукашэнка ляціць у Маскву. Сапраўды, ківач пайшоў у адваротны бок.
Цяпер чытаюць
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм14
Каментары