«Будзе вельмі цікава». Эйсмант паабяцала расказаць, хто з расіян фінансаваў Nexta
Прэс-сакратарка Аляксандра Лукашэнкі Наталля Эйсмант заявіла «РИА Новости», што крыху пазней будуць агучаныя прозвішчы і яшчэ шмат «цікавага», звязанага з фінансаваннем Telegram-канала Nexta.
Раман Пратасевіч у канцы мінулага тыдня распавёў у эфіры АНТ аб нейкім расійскім алігарху — канкурэнце Міхаіла Гуцэрыева, — чыя кампанія рэгулярна пералічвала сродкі Telegram-каналу Nexta.
Пратасевіч выказаў здагадку, што Telegram-канал у абмен на фінансаванне размяшчаў матэрыялы, у якіх быў зацікаўлены расійскі бізнэсмен. Ён не назваў яго імя, аднак заявіў, што назва фірмы звязана «з Уралам і горнай здабычай».
У Крамлі лічаць, што ў Мінску павінны растлумачыць абвінавачванні на адрас нейкага алігарха з Расіі ў фінансаванні апазіцыі, наўрад ці можна гуляць у кошкі-мышкі, заявіў у панядзелак прэс-сакратар прэзідэнта Расіі Дзмітрый Пяскоў.
«Усё тайнае рана ці позна становіцца яўным. І я перакананая, што так будзе і ў гэтым разе. Агучаныя будуць і прозвішчы, і яшчэ шмат усяго «цікавага». Крыху пазней», — сказала ў панядзелак Эйсмант.
Каментары