Украінскія вайскоўцы нанеслі ўдар па буксіры Чарнаморскага флоту РФ «Васіль Бех», на борце якога знаходзіўся зенітна-ракетны комплекс «ТОР».
Пра гэта паведамілі Ваенна-марскія сілы УСУ ў Тэлеграме.
У ведамстве паведамілі, што ўдар быў нанесены падчас транспарціроўкі буксірам на востраў Змяіны боепрыпасаў, узбраення і асабістага складу Чарнаморскага флоту.
«Нават наяўнасць на борце зенітна-ракетнага комплексу «ТОР» не перашкодзіла ваенна-марскім сілам УС Украіны дэмілітарызаваць расійскіх захопнікаў», — гаворыцца ў паведамленні.
Кіраўнік Адэскай абласной вайсковай адміністрацыі Максім Марчанка пацвердзіў паведамленні аб паспяховай ракетнай атацы ўкраінскіх сіл на расійскі карабель «Васіль Бех».
«Перадавайце віншаванні камандзе крэйсера «Масква»!»,— напісаў Марчанка ў сваім тэлеграм-канале.
Расейскія СМІ пісалі, што буксір «Васіль Бех», водазмяшчэннем 1 605 тон, увайшоў у склад Чарнаморскага флоту РФ у 2021 годзе.
Пазней з'явілася відэа меркаванага знішчэння.
Каментары