Экс-лідарку М'янмы Аун Сан Су Чжы прысудзілі яшчэ да сямі гадоў турмы
Суд у М'янме прысудзіў экс-дзярждарадцу краіны Аун Сан Су Чжы яшчэ да сямі гадоў зняволення. Агулам 77-гадовая лідарка апазіцыйнай «Нацыянальнай лігі за дэмакратыю» павінна будзе правесці ў турме 33 гады.
У апошняй — ужо 15-й — справе супраць Аун Сан Су Чжы лаўрэатку Нобелеўскай прэміі міру зноў абвінавацілі ў карупцыі, а менавіта ў куплі верталёта для аказання дапамогі ў раёнах стыхійных бедстваў і яго выкарыстанні нібыта ў асабістых мэтах. Судовы працэс быў цалкам закрыты для публікі, а пра вердыкт інфармагенцтвам распавяла ананімная крыніца.
Аун Сан Су Чжы, якая да лютага 2021 года была дэ-факта кіраўніком М'янмы, страціла ўладу ў выніку перавароту, калі ваенная хунта зрынула грамадзянскі ўрад. Паплечнікі Аун Сан Су Чжы і незалежныя эксперты заяўляюць, што судовыя справы супраць экс-лідаркі краіны палітычна матываваныя, каб узаконіць захоп улады вайскоўцамі, паведамляе Euronews.
Каментары