Беларускія мытнікі затрымалі велізарную партыю наркотыкаў — 637 кілаграмаў
Мытныя органы Беларусі выявілі канал паставак з Еўрасаюза ў Расію небяспечнага псіхатропу. У партыі было 637 кілаграмаў рэчыва.
Былі затрыманыя грамадзяне Літвы, Беларусі, Расіі і Украіны, датычныя да злачынства. Псіхатропы спрабавалі ўвезці ў краіну з літоўскага склада праз Латвію ў грузавіку, у якім паводле дакументаў павінны былі быць пасудамыйныя машыны.
Мытнікі на пункце пропуску «Грыгораўшчына» накіравалі велікагруз на сканіраванне, пасля чаго вырашылі правесці агляд. Унутры тэхнікі знайшлі фальгаваныя канверты — усяго 540 упаковак па 1 і 1,5 кг.
Эксперт пацвердзіў, што гэта псіхатроп 4-СМС. Паколькі грузавік скіроўваўся далей у Расійскую Федэрацыю, была праведзеная міжнародная аперацыя па выяўленні ўсіх удзельнікаў злачыннай схемы. У працэсе было знойдзена яшчэ 162 кілаграмы розных наркотыкаў і псіхатропаў (гашыш, мефедрон, МДМА, клефедрон і інш.), схаваных на тэрыторыі прыватнага дома і ў лясах Маскоўскай вобласці.
Усяго канфіскаваных рэчываў хапіла б больш чым на 3 мільёны разавых доз. Кошт такой партыі на чорным рынку дасягае $75 мільёнаў.
У дачыненні да падазраваных узбуджаная крымінальная справа ў Беларусі і Расіі. Удзельнікам злачыннай групы пагражае пакаранне ў выглядзе пазбаўлення волі тэрмінам да 20 гадоў.
Каментары