У Берліне на 8 і 9 мая забароняць чырвона-зялёны сцяг і партрэты Лукашэнкі
У Берліне плануюць увесці абмежаванні на выкарыстанне шэрагу сімвалаў падчас памятных мерапрыемстваў 8 і 9 мая, якія прысвечаныя заканчэнню Другой сусветнай вайны ў Еўропе. Паводле інфармацыі ад мясцовай паліцыі, забарона будзе тычыцца дэманстрацыі савецкай сімволікі, а таксама дзяржаўных сцягоў Расіі і Беларусі, піша «Еўрапейская праўда».
Абмежаванні плануюць увесці ў раёнах галоўных савецкіх мемарыялаў — у Тыргартэне, Трэптаў-парку і Шангольцэр-Хайдэ. Чакаецца, што афіцыйныя распараджэнні будуць апублікаваныя загадзя і будуць падобныя да тых, што ўжо дзейнічалі ў папярэднія гады.
Акрамя сцягоў, пад забарону трапляюць і іншыя элементы, звязаныя з расійскай вайной супраць Украіны. У прыватнасці, нельга будзе насіць расійскую вайсковую форму або яе часткі, дэманстраваць знакі адрознення, сімвалы Z і V, а таксама георгіеўскія стужкі.
Таксама будзе забаронена паказваць выявы кіраўнікоў Расіі, Беларусі і Чачні.
Асобна адзначаецца, што нельга будзе выконваць або прайграваць расійскія вайсковыя і маршавыя песні, а таксама дэманстраваць сімволіку, якая можа ўспрымацца як падтрымка вайны. У той жа час украінская сімволіка пад гэтыя абмежаванні не трапляе.
Пэўныя выключэнні прадугледжаныя для дыпламатаў і ветэранаў Другой сусветнай вайны.
Такія меры звязваюць з тым, што пасля 2022 года святкаванне 9 мая ў Расіі актыўна выкарыстоўваецца як частка дзяржаўнай прапаганды і апраўдання вайны супраць Украіны, таму нямецкія ўлады імкнуцца не дапусціць выкарыстання гэтай сімволікі для палітычных мэтаў падчас памятных мерапрыемстваў.
Цяпер чытаюць
«Мае спінагрызы са мной». Ціханоўская расказала, што ўжо выбірае для дзяцей школу ў Варшаве12
Каментары