Ліст з Валадаркі.
Прывітанне, сябры мае! Дзякуй за падтрымку, вельмі было важна ведаць, што я не адзін, што не забыліся на мяне.
Адмысловых надзей на судзе не меў, хоць пасля выступу Язэпа (Янушкевіча, гл. час 16.51 -- Рэд.) сам паверыў у сваю геніяльнасць. Варта было сесці ў турму, каб пачуць такія добрыя словы — я лёсік! Як правіла, людзі такое чуюць толькі на сваім пахаванні — а, дакладней, вядома, ужо і не чуюць. А мне вось пашчасціла яшчэ пры жыцці.
У дзяцінстве я марыў быць героем, шкадаваў, што няма вайны, — маўляў, няма дзе геройнічаць, а жыццё мне такі сюрпрыз паднесла! Сам сабе зайздрошчу.
Тое, што цяпер адбываецца ў краіне, яшчэ раз пацвярджае маю давыбарную думку:
будзе справядліва, калі АГЛ сам будзе расхлёбваць тое, што ён нарабіў, і народ запомніць яго праўленне па «апошніх словах» — галечы, росце цэнаў, беспрацоўі, «закручванні гаек»і да т.п.
Рыхтавалі мяне да пераезду ў Жодзіна — але нешта пакуль тармазнулі, знаходжуся ў поўнай невядомасці, дзе буду заўтра — не ведаю. Можа, вырашылі ўсіх нас сабраць?
Тут і Андрэй Саннікаў цяпер па суседстве — яго людзі бачылі — перадаў мне прывітанне. Карацей, усё добра. Вельмі прыемна, што ён успомніў мяне ў апошнім слове на судзе. Думаю, што гэта падзяка не толькі мне, але і ўсім «невядомым героям», якія працуюць на тое, каб мы хутчэй былі на волі.
У адрозненні ад астатніх сукамернікаў
мой тэрмін — нявызначаны часавы прамежак. Веру, што можам выйсці ў любы момант! Ведаю, што ўвесь свет за нас, таму адчуваю, што за намі не толькі ПРАЎДА, але і СІЛА. Каб мы сядзелі ў турме, НІКОМУ не выгадна.Перадаю маю шчырую падзяку замежным паслам, Ежы Бузэку, а таксама «Нашай Ніве», «Народнай Волі», «Хартыі» — дзякуй за падтрымку!
Жыву, гляджу скрозь шчыліны ў кратах на зялёныя дрэвы.
Бачыў Вінаградава, Кіркевіча, Васілевіча і інш. — нас усіх разам ганялі з матрацамі, здаваць — а потым назад. Усе трымаюцца малайцамі! Поўныя веры, што нядоўга нам яшчэ тут быць. Вядома, усё можа быць. Верым, чакаем.
* * *
Зміцер Дрозд — навуковец, архівіст, аўтар кнігі «Землеўласнікі Мінскай губерні
Каментары