Загінуў былы палітвязень Аляксей Ляўкевіч. Яго вызвалілі тры месяцы таму пасля візіту Коўла
Прычынай гібелі 38‑гадовага футбаліста стаў няшчасны выпадак.
Аляксей Ляўкевіч. Фота з ягонай старонкі Укантакце
Аляксей Ляўкевіч загінуў у канцы чэрвеня 2026 года. Хлопец патануў на возеры.
Ляўкевічу было 38 гадоў. Ён родам з Радашковічаў, але жыў у Бараўлянах.
У 2011 годзе скончыў Беларускі дзяржаўны тэхналагічны ўніверсітэт. Працаваў у будаўнічай сферы — займаўся ўкладкай пліткі і аздобнымі работамі.
Вялікай часткай яго жыцця быў спорт: Аляксей шмат гадоў гуляў у аматарскі футбол і міні-футбол. Ён выступаў у Прэм'ер-лізе 5х5 за каманды do-doma.by і «БелВЭБ», на яго рахунку дзясяткі матчаў і галоў.
Аляксей Ляўкевіч у 2021-м. Фота з ягонай старонкі Укантакце
Ляўкевіча арыштавалі ў канцы 2024 года. Яго асудзілі па трох палітычных артыкулах: ч. 1 арт. 368 (абраза Лукашэнкі), ч. 1 арт. 130 (распальванне варожасці) і арт. 369 (абраза прадстаўніка ўлады) — і абвесцілі «тэрарыстам».
Ляўкевіч трапіў у лік 250 палітвязняў, вызваленых 23 сакавіка 2026 года пасля чарговага візіту Джона Коўла. Яму дазволілі застацца ў Беларусі.
Аляксей нават паспеў згуляць у красавіку 2026 года за сваю міні-футбольную каманду.
На волі Аляксей Ляўкевіч пажыў толькі тры месяцы.
Мы выказваем спачуванні родным і блізкім былога палітвязня.
Чытайце таксама:
Футбаліста з Радашковічаў кінулі ў калонію — дачапіліся да каментаў
Аўтазаводца з Міханавічаў кінулі за краты за палітычныя выказванні
Алімпіядніка з Рэчыцы, які вучыўся ў БДУІР, асудзілі па справе Гаюна