Былога работніка Мінскага аўтазавода Вадзіма Жыдзіса арыштавалі ў сакавіку 2026 года. Мужчыну кінулі за краты за «распальванне варожасці».
Вадзіму Жыдзісу 39 гадоў. Ён з Міханавічаў. Доўгі час мужчына працаваў на Мінскім аўтамабільным заводзе. Раней гуляў у аматарскі футбол. У яго ёсць жонка і двое дзяцей.
У вольны час Жыдзіс цікавіўся аўтамабілямі і быў заўзятым аматарам пошуку з металашукальнікам. У тэлеграм-чатах Міханавічаў, дзе ён жыў, Вадзім быў вельмі актыўным карыстальнікам: шмат абмяркоўваў бытавыя праблемы ЖКГ, рамонт дарог і асартымент у мясцовых крамах, а таксама дзяліўся фотаздымкамі сваіх гістарычных знаходак з ваколіц і расказваў пра ўраджайныя грыбныя месцы.
Ён таксама рэагаваў на праявы «рускага свету» ў Беларусі, асуджаючы расійскую агрэсію супраць Украіны і ўсталяванне помнікаў расійскім дзеячам замест беларускіх.
Вадзіма арыштавалі ў канцы сакавіка 2026 года і змясцілі ў СІЗА. Яго абвінавацілі паводле часткі 1 артыкула 130 Крымінальнага кодэкса («наўмысныя дзеянні, накіраваныя на распальванне сацыяльнай варожасці»), якая часта выкарыстоўваецца для палітычных рэпрэсій.
Жыдзіса судзілі ў Мінскім гарадскім судзе. Дакладны прысуд невядомы, але, падобна, гэта калонія — анлайн ён так і не з'явіўся.
Паводле падлікаў аб'яднання сілавікоў «Белпол» і праваабаронцаў, па стане на вясну 2026 года былі вядомыя імёны 9594 людзей, якія падпалі пад палітычна матываваныя крымінальныя справы. Паводле тых жа падлікаў, усяго тыя ці іншыя палітычныя рэпрэсіі (крыміналкі, адміністратыўкі, звальненні, ператрусы) зачапілі каля 500 тысяч беларусаў. Некалькі соцень тысяч людзей вымушаныя былі пакінуць краіну.
«Экстрэмізмам» улады Беларусі лічаць падпіскі на незалежныя каналы, СМІ, наяўнасць спасылак на іх у сацыяльных сетках ці наяўнасць у сацсетках або на рэчах беларускай нацыянальнай сімволікі. Да «экстрэмізму» залічваюць таксама практычна ўсялякую крытыку ўладаў, афіцыйных гістарычных наратываў ці праявы салідарнасці з Украінай.
«Наша Нiва» — бастыён беларушчыны
ПАДТРЫМАЦЬЦяпер чытаюць
З Міністэрства культуры звольнілі першага намесніка Маркава3
Каментары