Jaŭhien Chmara budzie časova vykonvać abaviazki ministra abarony Ukrainy. Chto jon taki?

«Strateh, prafiesijanał, aryjentavany na ludziej kiraŭnik i aŭtarytetny vajskoviec», kažuć pra jaho. Chmara byŭ adnym z udzielnikaŭ apieracyi pa vyzvaleńni vostrava Źmiainy letam 2022 hoda.

Uładzimir Zialenski paviedamiŭ, što v.a. kiraŭnika SBU Jaŭhien Chmara budzie časova vykonvać abaviazki ministra abarony. Pra heta jon paviedamiŭ u sacyjalnych sietkach.

Da kanca niezrazumieła, jak Chmara moža ŭznačalić Minabarony navat u statusie v.a. Dla hetaha ŭrad spačatku pavinien pryznačyć jaho namieśnikam ministra i ŭpaŭnavažyć časova kiravać viedamstvam. Chmara znachodzicca na vajskovaj słužbie, a pavodle zakonu takuju pasadu moža zajmać cyvilny čałaviek, paviedamlaje Bi-bi-si — Ukraina.

«Strateh, prafiesijanał, aryjentavany na ludziej kiraŭnik i aŭtarytetny vajskoviec — tak charaktaryzavali v.a. kiraŭnika SBU Jaŭhienija Chmaru tyja, chto słužyŭ i pracavaŭ pobač ź im.

«U «Alfu» my pryjšli praktyčna ŭ adzin čas. Da hetaha jon słužyŭ u Centry śpiecyjalnaha pryznačeńnia «Amieha» Nacyjanalnaj hvardyi, a ja — u Desantnych vojskach», — uspaminaje pałkoŭnik SBU, deputat frakcyi «Hołas» Raman Kastenka.

Toje, što Chmara źjaŭlajecca vychadcam z «Amiehi», paćvierdziŭ i ciapierašni načalnik hetaha Centra śpiecpryznačeńnia hienierał-major Pavieł Jaciuk.

Raman Kastenka tak uspaminaje pačatak pracy z Chmaram u «Alfie»: «Jaŭhien pačynaŭ z taho, što byŭ bryčaram (bajcom siłavoha padraździaleńnia, hałoŭnaja zadača jakoha — zabiaśpiečyć chutkaje praniknieńnie padraździaleńnia ŭnutr budynka), a potym uznačaliŭ «śpiecnaz u śpiecnazie» — supierelitnaje padraździaleńnie ŭnutry samoj «Alfy», kudy byŭ udvaja macniejšy adbor, čym u sam Centr śpiecapieracyj «A»».

Zhodna z aficyjnaj bijahrafijaj Chmary, raspaŭsiudžanaj SBU, u struktury Słužby biaśpieki jon pracuje ŭžo amal 15 hadoŭ. U pryvatnaści, u pačatku poŭnamaštabnaha ŭvarvańnia jon udzielničaŭ u vyzvaleńni Kijeŭskaj vobłaści, a paśla jaje deakupacyi byŭ nakiravany na Danieččynu.

Jak raskazvali BBC News Ukraina ludzi, jakija viedajuć Chmaru, jon, siarod inšaha, udzielničaŭ u bajach za Sievieradanieck i Lisičansk. Chmara byŭ adnym z udzielnikaŭ apieracyi pa vyzvaleńni vostrava Źmiainy letam 2022 hoda. Sam jon nazyvaŭ jaje «adnoj z klučavych pieramoh nad voraham» u vajennym, ekanamičnym i psichałahičnym aśpiektach.

«Dla bajcoŭ Centra śpiecapieracyj «A» SBU było honaram udzielničać u hetaj śpiecapieracyi i hodna jaje realizavać», — padkreślivaŭ Chmara ŭ červieni 2023 hoda.

U krasaviku 2023 hoda prezident Zialenski pryznačyŭ Chmaru načalnikam Centra śpiecapieracyj «A».

«Alfa» paśla hetaha prosta zahrała inšymi farbami, i ŭsio, što jana rabiła potym, było vynikam stratehičnych zadum Jaŭhienija razam z Vasilom Malukom», — kaža Raman Kastenka.

«Centr śpiecapieracyj «A» stabilna ŭvachodzić u trojku najbolš vynikovych padraździaleńniaŭ Sił abarony pa abjomach źniščanaj techniki i žyvoj siły praciŭnika z dapamohaj bieśpiłotnikaŭ», — adznačajuć u samoj SBU. Tam taksama dadajuć, što apieratary dronaŭ Centra śpiecapieracyj «A» niepasredna ŭdzielničali ŭ śpiecapieracyi «Pavucina».

Chmara jak kamandzir cenić svaich padnačalenych, kažuć tyja, chto bačyŭ jaho ŭ pracy.

«Dla jaho aryjentavanaść na ludziej važnaja va ŭsich kirunkach. Jon asabista viedaje kožnaha paranienaha, dapamahaje im, padtrymlivaje ich, a taksama padtrymlivaje siemji zahinułych», — adznačaje Raman Kastenka.

Sam Chmara nieadnarazova raskazvaŭ pra toje, jak razam z bajcami «Alfy» niepasredna ŭdzielničaje ŭ śpiecapieracyjach.

«Mienavita tam možna zrazumieć, što mienavita patrebna asabovamu składu, jakija ŭ ich patreby… Druhoje — kamandzir pavinien dakładna razumieć, jak, što i dzie pracuje. Treciaje — heta pytańnie davieru: kali asabovy skład, asabliva ŭ ciažkich situacyjach, bačyć pobač svajho kamandzira, usio stanovicca na svaje miescy», — raniej padkreślivaŭ novy v.a. kiraŭnika SBU.

Ciapier Chmara — poŭny kavaler ordena Bahdana Chmialnickaha, a taksama ŭznaharodžany ordenam «Za mužnaść» III stupieni i adznakaj prezidenta Ukrainy «Kryž bajavych zasłuh».

«Jaŭhien dosyć aŭtarytetny ŭ śpiecsłužbach, jaho viedajuć usie kiraŭniki struktur. Jon padtrymlivaje suviazi z partniorami, što taksama važna. Jaho viedaje parłamiencki kamitet i dobra ź im kamunikuje», — adznačaje sakratar kamiteta Viarchoŭnaj Rady pa pytańniach nacyjanalnaj biaśpieki, abarony i raźviedki Raman Kastenka.

Kamientary da artykuła