Vypuścili pieršy ekziemplar, sieryjnaja vytvorčaść novaj madeli pačniecca ŭ hetym hodzie.
29 śniežnia ŭ Lidzie prezientavali ŭzor pasažyrskaha aŭtobusa novaj madeli — «Nioman 520123-250», vypuščany naprykancy 2012 hoda ŭ AAT «Lidskija aŭtobusy "Nioman"», paviedamlaje «Lidskaja hazieta». Pakul što aŭtobus isnuje ŭ adzinkavym ekziemplary, sieryjnaja vytvorčaść novaj madeli pačniecca ŭ hetym hodzie.
Pra novuju mašynu raskazaŭ načalnik adździeła markietynhu i zbytu pradpryjemstva Illa Licharad.
«Nioman 520123-250» — aŭtobus vialikaha kłasa, jon pryznačany dla haradskich i pryharadnych pieravozak. U im 44 siadziačych miescy, a ahulnaja pasažyraźmiaščalnaść — 70 čałaviek. Dyzajn novaha aŭtobusa źjaŭlajecca sumiesnaj raspracoŭkaj kanstruktarskaj słužby lidskaha AAT i śpiecyjalistaŭ Nacyjanalnaj akademii navuk Biełarusi.
Vyrablajecca jon z vykarystańniem ahrehataŭ viadomych jeŭrapiejskich kampanij «Deutz», «Raba», «ZF», a taksama z kamplektujučych ajčynnych vytvorcaŭ, u tym liku — lidskich.
Dadzienaja madel aŭtobusa adroźnivajecca palepšanaj kamfortnaściu. Dźviery ŭ im — prytulenaha typu (jany charaktaryzujucca padvyšanaj hiermietyčnaściu), siadzieńni — miakkija, z rehulavanaj śpinkaj. Raźmieščany siadzieńni na podyumach. Akramia hetaha, pasažyrskija siadziačyja miescy abstalavanyja padśvietkaj, bahažnymi palicami. Pa žadańni zakazčyka aŭtobus moža abstaloŭvacca kandycyjanierami i aŭdyjovideasistemaj. Taksama, pa žadańni zakazčyka, «Nioman 520123-250» moža vypuskacca ŭ troch vidach kamplektacyi: jak haradski aŭtobus, pryharadny i pryharadny palepšanaj kamfortnaści.
Da novaj madeli ŭžo prajavili cikavaść ŭkrainskija partniory lidskaha pradpryjemstva. Zaraz prapracoŭvajucca taksama pastaŭki na biełaruski rynak.
Kamientary