«Maja praca zhareła». Biełaruskija biznesy stracili tavar na składach Wildberries, ale majuć bolš šancaŭ na kampiensacyju, čym rasijanie

U noč na 18 lipienia ŭkrainskija bieśpiłotniki atakavali dva bujnyja łahistyčnyja kompleksy Wildberries — u padmaskoŭnaj Elektrastali i Katoŭsku Tamboŭskaj vobłaści. U Katoŭsku zahinuli siem supracoŭnikaŭ načnoj źmieny, jašče dziasiatki ludziej atrymali ranieńni. Paźniej stała viadoma, što ŭ balnicy pamior adzin z paciarpiełych u Elektrastali. Takim čynam, kolkaść zahinułych vyrasła da vaśmi.

U abodvuch kompleksach pačalisia maštabnyja pažary. Wildberries spyniŭ ich pracu, a ŭsie tavary, jakija ličylisia na hetych składach, časova źniaŭ z prodažu. Kampanija zajaviła, što pravodzić invientaryzacyju i vierniecca ź infarmacyjaj pra los pradukcyi paźniej.

Siarod tych, čyje tavary znachodzilisia ŭ Elektrastali, akazalisia i biełaruskija pradprymalniki.

«Dva hady ja prabivałasia na hetaj placoŭcy»

Uładalnica biełaruskaha mahazina Pando4ka.by raskazała, što adpraviła novuju partyju na Wildberries prykładna za dva z pałovaj tydni da ataki.

«Maja praca zhareła siońnia. Dva hady ja prabivałasia na hetaj placoŭcy, a ciapier maje kartki prosta hasiać, kali tavaru niama na składzie», — napisała jana ŭ tredsach.

Kolki mienavita pradukcyi znachodziłasia ŭ Elektrastali i kolki hrošaj straciła pradprymalnica, jana publična nie paviedamiła. Ale dla biznesu prablema nie abmiažoŭvajecca koštam zharełaj partyi.

Kali tavar źnikaje sa składa, jaho kartka pierastaje prynosić prodažy i pastupova stračvaje pazicyi ŭ vydačy Wildberries. U vyniku pradprymalnica ryzykuje stracić nie tolki samu pradukcyju, ale i vynik dvuch hadoŭ pracy: vodhuki, paznavalnaść, miesca ŭ pošuku i patok pakupnikoŭ.

Ciapier Pando4ka.by zaklikaje klijentaŭ rabić zakazy naŭprost, z dastaŭkaj praź Biełpoštu i Jeŭrapoštu.

«Wildberries vyras u miljardny biznes mienavita za košt nas, prostych pradaŭcoŭ. Ja patrabuju kampiensavać ludziam straty», — zajaviła pradprymalnica.

«Tam zachoŭvałasia bolšaja častka chałataŭ»

Pra mahčymuju stratu značnaj častki pradukcyi paviedamiła i biełaruskaja pradprymalnica Viktoryja Roŭbuc, jakaja pradaje na Wildberries chatniaje adzieńnie.

«U nas tam zachoŭvałasia bolšaja častka chałataŭ. Prosim vašaj padtrymki, zamoŭcie sabie chałacik. Raspradadzim reštki i sydziem z hetaj placoŭki», — napisała jana.

Pradprymalnica nazvała toje, što adbyvajecca na Wildberries, «biezzakońniem» i zajaviła, što paśla rasprodažu reštkaŭ choča spynić pracu z markietpłejsam.

Pamier mahčymych strat jana taksama nie nazvała. Pakul nieviadoma i toje, ci atrymaŭ biznes aficyjnaje paćviardžeńnie źniščeńnia pradukcyi. Wildberries časova prybraŭ tavary z prodažu, ale heta jašče nie aznačaje, što kožnaja adzinka, jakaja ličyłasia ŭ Elektrastali, fizična zhareła.

U kamientarach pad dopisam Viktoryi jašče adna pradprymalnica paviedamiła, što na składzie znachodziłasia jaje kaśmietyka. Jana adznačyła, što pakul čakaje navin. Tamu kazać pra paćvierdžanuju stratu hetaha tavaru pakul nielha.

Pavialičyć

Wildberries sapraŭdy źmianiŭ damovu pierad atakaj

Aściarohi rasijskich pradaŭcoŭ majuć padstavy. Novaja redakcyja afierty Wildberries №98 była apublikavanaja 1 lipienia 2026 hoda i ŭstupiła ŭ siłu 7 lipienia, za 11 dzion da ataki.

U dakumiencie źjaviŭsia asobny punkt, pavodle jakoha Wildberries vyzvalajecca ad adkaznaści, kali tavar byŭ stračany ŭ vyniku prymianieńnia, padzieńnia abo spracoŭvańnia ŭzbrajeńniaŭ, vajskovaj techniki, bojeprypasaŭ i latalnych aparataŭ, u tym liku BPŁA, a taksama ŭ vyniku abstrełaŭ i vybuchaŭ.

Papiaredniaja redakcyja taksama zhadvała abstaviny niepieraadolnaj siły, ale bieśpiłotniki i inšyja vajennyja pahrozy asobna ŭ joj nie pieraličvalisia.

Paśla ataki 18 lipienia kiraŭnica Wildberries Taćciana Kim padkreśliła, što kampanija nie abaviazanaja kampiensavać stračany tavar. Tym nie mienš jana paabiacała peŭnuju dapamohu:

«Niahledziačy na nadzvyčajnuju situacyju i adsutnaść abaviazku kampiensavać stračany tavar, my ŭžo prapracoŭvajem abjomy vypłat pradaŭcam i inšyja miery finansavaj padtrymki».

Pakul nieviadomyja ni pamiery vypłat, ni formuła ich raźliku, ni terminy. Ale havorka pra harantavanuju poŭnuju kampiensacyju nie idzie. 

Dla biełaruskich pradaŭcoŭ dziejničaje inšaja afierta

Važny niuans: skandalnaja papraŭka pra bieśpiłotnikaŭ źjaviłasia tolki ŭ rasijskaj afiercie.

Dla jurydyčnych asob i indyvidualnych pradprymalnikaŭ, zarehistravanych u Biełarusi, dziejničaje asobnaja afierta Wildberries №51, jakaja ŭstupiła ŭ siłu 29 krasavika 2026 hoda. U lipieni jaje nie źmianiali.

U hetym dakumiencie niama słoŭ «BPŁA», «bieśpiłotnik», «abstreł» abo asobnaha pieraliku vajennych ryzyk. Tam zachavałasia ahulnaja norma:

«U vypadku straty tavaru, za vyklučeńniem vypadkaŭ, kali takaja strata źjaŭlajecca nastupstvam abstavin niepieraadolnaj siły, Wildberries abaviazvajecca kampiensavać pradaŭcu realnuju škodu».

Akramia taho, u biełaruskaj afiercie prapisana, što da adnosin bakoŭ prymianiajecca zakanadaŭstva Biełarusi.

Heta nie harantuje aŭtamatyčnaj vypłaty: Wildberries moža pasprabavać davieści, što ataka bieśpiłotnikaŭ była abstavinami niepieraadolnaj siły. Adnak kampanija nie moža prosta spasłacca na novy rasijski punkt pra BPŁA, kali kabiniet pradaŭca aformleny na biełaruskaha IP abo biełaruskuju jurydyčnuju asobu.

Pry hetym vyznačalnaje značeńnie maje nie hramadzianstva ŭładalnika biznesu, a kraina rehistracyi pradaŭca. Biełarus, jaki pracuje praz rasijskaha IP abo rasijskuju kampaniju, padparadkoŭvajecca rasijskaj afiercie. Kali ž biznes zarehistravany ŭ Biełarusi, dziejničaje biełaruskaja viersija damovy.

Punkt pra bieśpiłotniki jašče nie aznačaje, što možna śpisać uvieś tavar

Navat stanovišča rasijskich pradaŭcoŭ nie takoje bieznadziejnaje, jak moža padacca.

Rasijskija jurysty źviartajuć uvahu: Wildberries niedastatkova paviedamić, što na skład prylacieŭ dron. Kampanii nieabchodna vyznačyć, dzie znachodziłasia kožnaja kankretnaja partyja i što mienavita ź joj adbyłosia.

Tavar moh być źniščany niepasrednym udaram abo vybucham, zhareć paśla raspaŭsiudžvańnia ahniu, paciarpieć ad dymu, vady abo abrušeńnia składa, zhubicca padčas evakuacyi i pieramiaščeńnia, źniknuć z uliku ŭžo padčas invientaryzacyi.

Najbolš składana budzie patrabavać hrošy za pradukcyju, źniščanuju niepasredna ŭ zonie vybuchu. Ale kali tavar zhareŭ praź nieefiektyŭnuju sistemu pažaratušeńnia, parušeńnie supraćpažarnych adsiekaŭ, pamyłki padčas likvidacyi nastupstvaŭ abo prosta źnik sa składskoha ŭliku, spasyłki na ahulny fakt ataki moža być niedastatkova.

Biełaruskim pradaŭcam hetaja łohika taksama moža spatrebicca. Im važna zachavać spravazdačy pra reštki na 17 i 18 lipienia, historyju pastavak i pieramiaščeńniaŭ, skrynšoty i videazapis asabistaha kabinieta, akty pryjomki, nakładnyja i numary pastavak, dakumienty, jakija paćviardžajuć sabiekošt pradukcyi, paviedamleńni Wildberries pra źmianieńnie statusu tavaraŭ.

Pakul invientaryzacyja nie skončanaja, dadzienyja ŭ asabistym kabiniecie mohuć źmianicca.

Što budzie z zakazami pakupnikoŭ

Dla ludziej, jakija ŭžo zamovili tavary z paciarpiełych składoŭ, situacyja praściejšaja. Sprečka pamiž Wildberries i pradaŭcami pra fors-mažor nie pazbaŭlaje pakupnika prava atrymać tavar abo viarnuć hrošy.

Kali pradukcyja acaleła, jaje mohuć adpravić praź inšy łahistyčny centr — tady dastaŭka prosta zatrymajecca. Kali tavar źniščany, zakaz pavinny admianić.

Pry apłacie paśla atrymańnia hrošy nie buduć śpisanyja. Kali pakupnik unios pieradapłatu, jaje pavinny viarnuć na bankaŭskuju kartku abo ŭ WB-kašalok.

Pakul zakaz moža praciahvać adlustroŭvacca jak tavar «u darozie» abo na składzie. Wildberries rekamienduje čakać abnaŭleńnia statusu. Kali dastaŭka zatrymlivajecca bolš čym na piać dzion, u dadatku pavinna źjavicca knopka admieny.

• 2
• 1
• 32
• 0
• 3
• 3
• 0
• 0