Mižnarodny dzień achovy pomnikaŭ i histaryčnych miaścin zasnavany ŭ 1983 IKAMOS, Mižnarodnym savietam pa pytańniach achovy pomnikaŭ i słavutych miaścinaŭ, śviatkujecca z 1984-ha kožnaha 18 krasavika.
Biełaruskaje dobraachvotnaje tavarystva achovy pomnikaŭ historyi i kultury tradycyjna sustrakaje hety dzień mierapryjemstvami — paznavalnaj ekskursijaj, vałanciorskaj tałakoj, kruhłym stałom ci inšaj inicyjatyvaj.
U hetym hodzie siabry hramadskaha abjadnańnia zapłanavali čarhovuju tałaku pa dobraŭparadkavańniu ryma-katalickich mohiłak pobač z ruinami byłoha daminikanskaha kaścioła ŭ miastečku Ziembin Barysaŭskaha rajona.
«Ale pryroda ŭnosić svaje karektyvy, i poźniaja zima, i viasna, jakaja pa sapraŭdnamu jašče nie pačałasia, nie chočuć puskać nas na pracy 20 krasavika, pra jakija my samaŭpeŭniena ŭžo paśpieli abvieścić» — havorycca ŭ paviedamleńni Tavarystva achovy pomnikaŭ.
Tamu pryniata rašeńnie pra adsoŭvańnie tałaki na bolš poźni termin, a mienavita na 18 maja, da Mižnarpodnaha dnia muziejaŭ, dnia, jaki pryśviečany skarbnicam pa zachavańniu i ekspanavańniu ruchomych pomnikaŭ, ruchomych kulturnych zdabytkaŭ.
Akramia taho, Tavarystva achovy pomnikaŭ pry padtrymcy ahulnanacyjanalnaj kampanii «Budźma biełarusami» padrychtavała da vypusku multymiedyjny dysk.
Na dysku prezientavana praca architekturnaj siekcyi — daśledčyja prajekty i architekturnyja prajektnyja prapanovy, praca nad jakimi viałasia ŭ 2010 – 2012-m hh. Heta materyjały pa cełamu šerahu, jak isnujučych, tak i stračanych historyka-kulturnych abjektaŭ Minska, Biareścia, Mahilova, pa abjektach žydoŭskaj kulturnaj spadčyny.
Dysk budzie razasłany pa archiŭnych, muziejnych i biblijatečnych ustanovach, pieradadzieny dla karystańnia partniorskim arhanizacyjam, jak u Biełarusi, tak i za jaje miežami, budzie raspaŭsiudžvacca na prezientacyjach, jakija płanujucca nie tolki ŭ Minsku, ale i ŭ inšych nasielenych punktach Biełarusi, i infarmacyja ab praviadzieńni jakich budzie dadatkova raźmiaščacca ŭ srodkach masavaj infarmacyi.
Kamientary