26 žniŭnia 2007 h., u 70‑ju hadavinu trahičnych padziejaŭ, kali ŭ mienskaj viaźnicy NKVD byli rasstralanyja apošnija katalickija śviatary Miensku, vierniki ŭsich parafij stalicy malilisia za achviaraŭ represij.
26 žniŭnia 2007 h., u 70‑iu hadavinu trahičnych padziejaŭ, kali ŭ minskaj viaźnicy NKVD byli rasstralanyja apošnija katalickija śviatary Minska, vierniki ŭsich parafij stalicy malilisia za achviaraŭ represij. Z hetaj nahody Apostalski Administratar Minska‑Mahiloŭskaj archidyjacezii biskup Antoni Dziamjanka pravioŭ nabaženstvy ŭ niekatorych minskich kaściołach, dzie słužyli represavanyja śviatary.
U hamilii biskup Antoni padkreśliŭ viernaść śviataroŭ svaim pastyrskim abaviazkam i zaachvociŭ viernikaŭ da jašče bolšaj ruplivaści ŭ kłopacie pra śviatyni, dzie słužyli Bohu i ludziam hetyja mužnyja śviedki viery. Siońniašni čas, jak kolišni pieryjad vajaŭničaha ateizmu, taksama niasie niebiaśpieku dla viery: maralny relatyvizm, ehaizm i relihijnuju abyjakavaść.
«Prykład prodkaŭ, jakija luboŭ da Boha i Kaścioła paćvierdzili canoju svajho žyćcia, niachaj dapamahaje naščadkam u raźvićci svajoj viery i zachavańni duchoŭnych tradycyj. Padtrymańnie śviatych miescaŭ u naležnym i hodnym stanie niachaj budzie znakam udziačnaści śviataram tych časoŭ za achviarnaje słužeńnie dziela zachavańnia viery na našych ziemlach», — adznačyŭ Apostalski Administratar.
Biskup Antoni Dziamjanka taksama zaachvociŭ da malitvy ab novych śviatarskich i manaskich paklikańniach, kab i siońnia va ŭsich kaściołach — jak adčynienych, tak tych, što jašče budujucca, — byli śviatary, jakija, niby zvon na viežy kaścioła, buduć abviaščać Božuju chvału i vieści viernikaŭ da Chrysta.
Karotkija bijahrafičnyja źviestki pra śviataroŭ, represavanych u 1937 h. u minskaj viaźnicy NKVD
Stanisłaŭ Rajka naradziŭsia ŭ Starakanstancinavie Vałynskaj hubiernii ŭ 1873 h. Duchoŭnuju sieminaryju skončyŭ u Žytomiry. Potym vučyŭsia ŭ Duchoŭnaj akademii ŭ Pieciarburhu, dzie atrymaŭ tytuł mahistra teałohii. U 1935 h. pačynaje pracavać u Biełarusi. U 1936 h. byŭ administrataram parafii sv. Barbary ŭ Viciebsku, paźniej — parafii ŭ Smalanach Aršanskaha rajona. Tam byŭ aryštavany 13 lutaha 1937 h. 25 žniŭnia taho ž hoda pavodle pastanovy NKVD byŭ asudžany na śmierć. Prysud byŭ vykanany 27 žniŭnia 1937 h. u viaźnicy NKVD u Minsku.
Piotr Janukovič naradziŭsia 18 kastryčnika 1863h. u vioscy Dzianisava parafii Miory Vilenskaj dyjacezii. Paśla zakančeńnia himnazii ŭ Vilni raspačaŭ u vieraśni 1886 h. vučobu ŭ Mitrapalitalnaj duchoŭnaj sieminaryii ŭ Pieciarburhu, jakuju skončyŭ u 1891 h. Śviatarskaje paśviačeńnie atrymaŭ u Koŭnie. Naležaŭ da Mahiloŭskaj archidyjacezii. U lipieni 1892 h. byŭ mienavany vikaryjem parafii Lucyn Viciebskaj hubiernii. U mai 1897 h. atrymaŭ naminacyju na probašča parafii Kamień Minskaha dekanatu. U vieraśni 1904 h. staŭ administrataram parafii Dubrova Aršanskaha dekanatu. Z 5 sakavika 1909 da krasavika 1911 byŭ probaščam i dekanam parafii ŭ Bychavie, a zatym — probaščam i dekanam u Niaśvižy. Z 9 da 14 vieraśnia 1919 h. byŭ aryštavany i asudžany na prymusovyja pracy. Paśla nastupnaha aryštu 9 sakavika 1923 h. byŭ asudžany na 3 hady źniavoleńnia. Adbyŭšy pakarańnie, prykładna z 1926 pa 1934 h., byŭ administrataram parafii Faščaŭka Mahiloŭskaha dekanatu. Apiekavaŭsia taksama parafijaj u Škłvie Mahiloŭskaha dekanatu. 25 vieraśnia 1937 h. u Faščaŭcy byŭ znoŭ aryštavany i asudžany na śmierć, a praz dva dni rasstralany.
Kanstanty Andrekus naradziŭsia ŭ 1875 h. Naležaŭ da Mahiloŭskaj archidyjacezii. Byŭ vypusknikom Mitrapalitalnaj sieminaryi ŭ Pieciarburhu. Z 1906 pa 1911 byŭ administratam, a paźniej probaščam parafii Ivandar dekanatu Čerykaŭ—Čavusy. Prykładna z 1911 pa 1917 h. pracavaŭ jak administratar parafii Łazavica Klimavicka—Mścisłaŭskaha dekanatu. Z 1924 pa 1930 h. byŭ administrataram parafii ŭ Homieli i dekanam Homielskim. U 1934 h. byŭ aryštavany i asudžany na śmierć 25 žniŭnia 1937 h. Praz dva dni byŭ rasstralany ŭ viaźnicy NKVD u Minsku.
Jan Baravik naradziŭsia ŭ 1877 h. Naležaŭ da Mahiloŭskaj archidyjacezii. Vučyŭsia ŭ Mahiloŭskaj mitrapalitalnaj duchoŭnaj sieminaryi ŭ Pieciarburhu, a potym u Duchoŭnaj akademii i atrymaŭ stupień kandydata teałahičnych navuk. U 1904—1910 hh. byŭ spačatku vikaryjem (da 1905h.), a potym administrataram parafii Prydrujsk dekanatu Drysa—Siebiež. Z 1911 h. pracavaŭ jak administratar parafii Faščaŭka Mahiloŭskaha dekanatu. Paźniej pracavaŭ u parafii Tałačyn Aršanskaha dekanatu, a taksama ŭ parafii Sienna. U 1933 h. byŭ mienavany probaščam minskaj parafii Najśviaciejšaj Trojcy (sv. Rocha) na Załatoj Horcy i administrataram kaścioła na kalvaryjskich mohiłkach u Minsku. Byŭ rasstralany ŭ Minsku 27 žniŭnia 1937 h. Ks. Jan Baravik udzialiŭ sakramant chrostu siońniašniamu probašču parafii Uzvyšeńnia Sv. Kryža na Kalvaryjskich mohiłkach u Minsku ks. Albiertu Masalskamu.
Piotr Aŭhła naradziŭsia 11 maja 1861 h. u vioscy Unhury (Litva). U 1882 h. raspačaŭ vučobu ŭ Mitrapalitalnaj duchoŭnaj sieminaryi ŭ Pieciarburhu, jakuju skončyŭ u 1887 h. Z 12 kastryčnika 1887 h. da 17 śniežnia 1896 h. byŭ vikaryjem, a paźniej administrataram parafii ŭ Mścisłavie i dekanam Klimavicka—Mścisłaŭskim. Z kanca 20‑ch hadoŭ byŭ vikaryjem hienieralnaha apostalskaha administratara ŭ Mahilovie. Z 6 lipienia 1925 h. vykonvaŭ funkcyi administratara parafii sv. Barbary i dekana Viciebskaha. Tut byŭ čarhovy raz aryštavany. Vyzvaleny praz 6 miesiacaŭ, pad prymusam z boku HPU prybyŭ u Mahiloŭ i zaniaŭ pasadu probašča katedralnaj parafii. Paśla aryštu ŭ kaplicy na mohiłkach u Mahilovie 13 červienia1937 h. byŭ asudžany na śmierć i rasstralany.
Ciapier čytajuć
Skandał u połackaj škole: maci śćviardžaje, što jaje syna źbili na treniroŭcy pa dziudo — tak chłopca «vychoŭvaŭ» trenier11
Kamientary