«Nanios udar nahoj u vobłaść hałavy supracoŭniku milicyi»
Žychara Homiela aryštavali na piać miesiacaŭ za źbićcio dvuch milicyjantaŭ.
Jak paviedamiła BiełaPAN staršy pamočnik prakurora Čyhunačnaha rajona Homiela Vieranika Niekraševič, złačynstva hamialčanin učyniŭ u sakaviku 2013 hoda. Abvinavačany ŭ niećviarozym stanie zajšoŭ u mahazin i ckraŭ tam navušniki. Jaho zatrymała achova i pieradała milicyi. Chłopca dastavili ŭ aporny punkt. Znachodziačysia tam, abvinavačany vyrašyŭ pakuryć, adnak rabić heta ŭ pamiaškańni apornaha punkta jamu zabaranili. Ihnarujučy patrabavańni supracoŭnikaŭ milicyi, małady čałaviek usio ž zrabiŭ sprobu zakuryć. U hety momant da jaho padyšoŭ supracoŭnik milicyi, i abvinavačany napaŭ na jaho, zrabiŭšy zachop rukoj šyi, i pavaliŭ na padłohu.
Kali supraćpraŭnyja dziejańni hamialčanina byli spynieny, jaho vyvieli z pamiaškańnia apornaha punkta, kab dastavić u inšaje adździaleńnie milicyi. Abvinavačany byŭ źmieščany na zadniaje siadzieńnie słužbovaha aŭtamabila. Adtul mužčyna nanios udar nahoj u vobłaść hałavy supracoŭniku milicyi, jaki siadzieŭ napieradzie za rulom, a zatym staŭ nanosić udary pa sałonie aŭtamabila.
Rašeńniem suda Čyhunačnaha rajona Homiela małady čałaviek pryznany vinavatym va ŭčynieńni nasilla ŭ dačynieńni da supracoŭnikaŭ orhanaŭ unutranych spraŭ, kab pieraškodzić ich zakonnaj dziejnaści (art. 364 KK). Pryhavor nabyŭ zakonnuju moc.
Heta nie pieršy za hod abvinavaŭčy pryhavor za nasille ŭ dačynieńni da milicyjanieraŭ u abłasnym centry. Raniej za źbivańnie supracoŭnika milicyi na dva hady adpraviŭsia ŭ miescy pazbaŭleńnia voli žychar Homiela 1990 hoda naradžeńnia. Małady čałaviek učyniŭ złačynstva padčas adbyćcia pakarańnia za anałahičnaje supraćpraŭnaje dziejańnie. U listapadzie 2011 hoda abvinavačany z tavaryšam učynili deboš u ciahniku. Ucichamiryć chulihanaŭ na stancyi Orša prybyli milicyjaniery. Chulihany nakinulisia na supracoŭnikaŭ pravaachoŭnych orhanaŭ i parvali im abmundziravańnie. Sud Aršanskaha rajona pryhavaryŭ abodvuch da paŭtara hadoŭ abmiežavańnia voli z nakiravańniem u papraŭčuju ŭstanovu adkrytaha typu. Adbyvajučy pakarańnie, abvinavačanyja adpravilisia ŭ Homieli ŭ hulniavy kłub, dzie taksama ŭčynili deboš. Achova vyklikała milicyju. Kali mužčyn dastavili ŭ aporny punkt milicyi, adzin ź ich napaŭ na milicyjaniera, pryčyniŭšy jamu lohkija cialesnyja paškodžańni.
Kamientary