Aŭtamabilisty ŭ Baranavičach šturmujuć stancyi techabsłuhoŭvańnia, kab paźbiehnuć novaha padatku
Baranavičy, stancyja techničnaha absłuhoŭvańnia pa Telmana. 17 hadzin. Chvost kałony žadajučych prajści techahlad bačny ŭžo zdalok. Častka mašyn staić na vulicy – astatnija ŭžo minuli šłahbaŭm i čakajuć za płotam.
Šmat vadzicielaŭ adkazvajuć, što da płanavaha ahladu im jašče šmat času i jany tut ź inšaj nahody. Skidvajučy na ziamlu popieł ad cyharety, Dzianis raspaviadaje ab svaich metach:
– Ja staju, kab potym nie płacić, voś i ŭsio. A za što płacić – za hety razvod na darohi?! Rastłumač mnie. Hrošy ŭ nikudy – za stolki hod pieršy raz niešta zrabili z našymi darohami. Ja ŭpeŭnieny, što ŭviesnu im chana. I nie fakt, što zrobiać jašče raz… Spytaj usich maich znajomych – jany tabie toje ž samaje adkažuć.
Čarha na baranavickich STA vyklikana pryniaćciem rezanansnaha zakonu. Vadzicieli spadziajucca, što kali jany projduć techahlad da pačatku studzienia – pakul zakon jašče nie ŭstupiŭ u moc, nie treba budzie płacić padatak u 2014 hodzie. I navat u 2015 – dla tych aŭtamabilaŭ, čyj uzrost nie bolej za 10 hod.
Ale na samoj stancyi jašče nie vielmi dobra razumiejuć pryncyp novaŭviadzieńnia:
– Nijakich tłumačeńniaŭ u nas niama. Navat nie viedajem, kudy płacić, za što płacić. Napisana, što treba pry prachodzie techahladu, a chto budzie heta praviarać – ja nie viedaju. Voś niedzie pałova ŭsich, chto staić, mienavita z hetaj nahody – kab zachavać svaje hrošy, – kaža kiraŭnik stancyi techabsłuhoŭvańnia HAP №4, Anatol Hładki.
Na vulicy ŭžo ciomna, ale čarha zachoŭvajecca. Supracoŭniki miarkujuć, što šmat ludziej nie paśpiejuć prajści da kanca dnia.
Pres-sakratar Ministerstva finansaŭ u telefonnaj razmovie abnadziejvaje aŭtaŭładalnikaŭ:
– Sapraŭdy, papraŭka da zakonu ŭstupaje ŭ moc u novym finansavym hodzie – heta 1 studzienia 2014 hodu. Spahaniać padatak buduć pry prachodzie techahladu. A kali jaho prachodzić – asabistaja sprava kožnaha vadziciela.
Kamientary