Ekśpierty Mižnarodnaha valutnaha fondu ličać, što kurs biełaruskaha rubla zavyšany. Takaja vysnova ŭtrymlivajecca ŭ listapadaŭskim dakładzie MVF, jaki apublikavany na jaho sajcie. Dakumient byŭ padrychtavany dla abmierkavańnia na śniežańskim pasiadžeńni vykanaŭčaha savieta fondu.
Ekanamisty fondu adznačajuć, što
kurs biełaruskaha rubla na praciahu 2013 byŭ panižany na «značna mienšuju vieličyniu, jakaja była b apraŭdanaja z ulikam vialikaj roźnicy va ŭzroŭni inflacyi z asnoŭnymi handlovymi partniorami i istotnaha pavyšeńnia zarabotnaj płaty».
Jak havorycca ŭ dakładzie, zroblenyja raźliki pakazvajuć, što «ŭ spałučeńni z rezkim paharšeńniem stanu rachunku biahučych apieracyj» kurs biełaruskaha rubla, mahčyma, zavyšany.
Pa źviestkach MVF,
u pieryjad pikavaha cisku na rubiel u červieni -lipieni 2013 Nacbank «pravodziŭ značnyja interviencyi na valutnych rynkach z metaj padtrymki nacyjanalnaj valuty,
ale z taho času interviencyi niekalki źmienšylisia».
Kab skaracić źniešnija dysbałansy i praduchilić dalejšyja straty reziervaŭ, ułady pavinny źvieści da minimumu valutnyja interviencyi i pavysić hibkaść abmiennaha kursu, miarkujuć ekanamisty fondu.
Razam z tym ekśpierty ŭ svaim dakładzie kanstatujuć, što
praviedzienyja ź dziaržaŭnymi orhanami kansultacyi pakazvajuć niehatoŭnaść biełaruskich uładaŭ da bolš chutkich tempaŭ pasłableńnia nacyjanalnaj valuty.
«Aficyjnyja orhany pryznali nieabchodnaść hnutkaha abmiennaha kursu, ale vystupali za pavolnyja tempy źnižeńnia kursu.
Ułady pa-raniejšamu byli hłyboka zaniepakojenyja mahčymaj reakcyjaj rynku, śćviardžajučy, što čakańni šyrokaj hramadskaści praciahvajuć farmiravacca na asnovie dośviedu kryzisu 2011 hoda
i što lubyja surjoznyja źmieny abmiennaha kursa mohuć vyklikać rezkaje padzieńnie kursu biełaruskaha rubla», — havorycca ŭ dakładzie MVF.
Akramia hetaha, jak adznačajuć u fondzie, ułady «taksama byli zaniepakojenyja tym, što rezkaje skaračeńnie interviencyj moža pryvieści da praźmiernaj vałacilnaści niehłybokich valutnych rynkaŭ».
Jak paviedamlałasia raniej, vosieńniu 2013 hoda ŭ Minsku znachodziłasia misija MVF, jakaja ŭ ramkach piataha postprahramnaha manitorynhu praviała sieryju kansultacyj ź biełaruskimi ŭładami. Nahadajem, kredytnaja prahrama z MVF, u ramkach jakoj Biełaruś atrymała kala 3,5 młrd. dalaraŭ, była realizavana ŭ 2009-2010 hadach.
Kamientary