Ała Puhačova naradziłasia ŭ Maskvie 15 krasavika 1949. Jaje baćka, frantavik, byŭ dyrektaram pa zbycie na abutkovaj fabrycy i navat siadzieŭ u turmie za «haspadarčyja złoŭžyvańni» ŭ 60-ja. Maci, Zinaida Archipaŭna Adehava, pracavała na zavodzie ŭ adździele kadraŭ. Ich užo niama, aboje pamierli ad infarktaŭ. Baćki byli talenavitymi ludźmi: tata ihraŭ u narodnym teatry, maci ŭ čas vajny jeździła pa frantach z ahitbryhadaj. U Puhačovaj byŭ jašče brat Jaŭhien, vajskoviec, ale jaho taksama nie stała praz prablemy z sercam.
Puhačova vybuchnuła ŭ adzin momant — na fiestyvali «Załaty Arfiej» u Bałharyi ź pieśniaj «Arlekina»
Heta było ŭ 1975-m. Nasamreč šlach da hetaha fiestyvalu byŭ doŭhi — muzykaj Puhačova zajmałasia ź piaci hadoŭ, śpiavała ŭ arkiestry Aleha Łundstrema, z ahitbryhadami radyjostancyj vystupała pierad palarnikami i hieołahami na Krajniaj Poŭnačy.
«Puhačova była adnoj z redkich indyvidualnaściej na tahačasnaj savieckaj scenie. Mienavita indyvidualnaść jaje vyłučała, — kaža muzyčny krytyk Źmicier Padbiarezski. – U niejkim sensie jaje možna paraŭnać z Kłaŭdzijaj Šulženka, tolki na novym etapie, z novym muzyčnym materyjałam.
Jana była admietnaja tym, što dumała nie tolki pra vykanańnie pieśni, ale i pra pakaz jaje na scenie, spałučajučy muzyku i artystyzm.
I jaje styl pa pieršym časie byŭ revalucyjnym dla savieckaj estrady».
Puhačova i Biełaruś
Jak śćviardžaje stryječny dziadźka Puhačovaj Juryj, jaki cikaviŭsia hienieałohijaj rodu, ich supolnaha
prapradzieda Ivana maskoŭski pamieščyk pasłaŭ akonamam z Maskvy ŭ svoj majontak u vioscy Uzhorsk na Mahiloŭščynie. Taksama toj pamieščyk čamuści siłaj ažaniŭ Ivana z adnavokaj Małańniaj.
Adnak va Uzhorsku Ivan zakachaŭsia, Małańniu kinuŭ i ažaniŭsia druhim šlubam. Ad taho šlubu i naradziŭsia Pavieł, pradzied Puhačovaj. Jany z prababulaj Maryjaj taksama žyli va Uzhorsku, što na Prapojščynie (ciapier Słaŭharadski rajon Mahiloŭskaj vobłaści). Jany mieli siamiora dziaciej, Maryja (u akruzie była viadomaj lekarkaj i varažbitkaj) dažyła amal da 90 hadoŭ, pachavanaja ŭ vioscy Niadašava (Mahiloŭskaja vobłaść), Pavieł pamior u 40-hadovym vieku (pachavany va Uzhorsku). U Niadašavie daniadaŭna žyła ciotka Puhačovaj, Valancina Vałujeva.
Dzied śpiavački Michaił ź siamjoj u 1933 uciok u Maskvu ad kalektyvizacyi.
Puhačova i aniekdoty
Puhačova była ŭ SSSR bolš čym śpiavačkaj, jana była ikonaj stylu, hierainiaj aniekdotaŭ (razam ź viečnaj kankurentkaj-antypodam Safijaj Rataru) i ananimnych paem (razam z Rejhanam, Harbačovym i toj ža Safijaj Rataru).
Pra Puhačovu składali navat palityčnyja aniekdoty. Voś, naprykład, takija:
— Chto taki Brežnieŭ?
— Drobny palityk časoŭ Ały Puhačovaj.
Puhačova i mužy
Ich było nie tak i mnoha — usiaho piać.
Cyrkavy artyst Mikałas Orbakas (heta jaho dačka Kryścina Arbakajcie), režysior Alaksandr Stefanovič, pradusar Jaŭhien Bołdzin, śpiavak Filip Kirkoraŭ i paradyst Maksim Hałkin. Aproč taho, voks populi źviazvaŭ Puhačovu ramantyčnymi suviaziami z pačynajučym artystam Čałabanavym i pop-rok-śpievakom Uładzimiram Kuźminym.
Užo nie majučy chitovaha repiertuaru i – budziem ščyrymi — hołasu, Puhačova dziesiacihodździami padtrymlivaje cikavaść da siabie, pieratvaryŭšy ŭ šou-biznes ułasnaje asabistaje žyćcio.
Puhačova i «Pieśniary»
Cikava, što na ŭźlocie karjery, u 1975-m, Puhačova vystupała ŭ Kanach na Mižnarodnym muzyčnym kirmašy razam z «Pieśniarami». I «Pieśniary» zacikavili zachodnich pradusaraŭ namnoha bolš, bo styl i repiertuar Puhačovaj nie byŭ takim navatarskim. I heta nie ŭsio, što źviazvaje Puhačovu ź biełaruskim kalektyvam. Jak nieadnarazova śćviardžaŭ u intervju salist «Pieśniaroŭ» Leanid Bartkievič, jon pravioŭ «niezabyŭnuju noč» z Puhačovaj padčas sumiesnych hastrolaŭ. Puhačova heta admaŭlaje, darečy.
Puhačova i jaje nieruchomaść
Puhačova — adna z najbahaciejšych artystak Rasii. Jana nieadnarazova ŭvachodziła ŭ «rejtynh znakamitaściaŭ Forbes», dzielačy lidarskija miescy ź śpievakom Stasam Michajłavym i tenisistkaj Maryjaj Šarapavaj. Pavodle taho ž «Forbsu» prybytak śpiavački ŭ 2011skłaŭ 4,8 młn dalaraŭ.
Puhačova maje kvateru ŭ 500 kv m u Maskvie. Kvateru joj padaryŭ ziać, biznesoviec čačenskaha pachodžańnia Rusłan Bajsaraŭ, Puhačova tolki vybrała miesca — Filipaŭski zavułak. Cikava, što adbyłosia heta chutka paśla raźvitańnia ź Filipam Kirkoravym — taki sabie humar śpiavački.
Taksama Puhačova maje katedž na ŭčastku ŭ 50 sotak u vioscy Bieražki ŭ Padmaskoŭi,na bierazie Istrynskaha vadaschovišča.
Puhačova ciapier
Ad 2010 Puhačova nie kancertuje. Praŭda, jana zapisała niekalki piesień, adna ź jakich, «Samy vysoki», była pryśviečanaja aliharchu Michaiłu Procharavu i nieadnarazova vykonvałasia padčas prezidenckich vybaraŭ 2011 u Rasii, dzie Procharaŭ byŭ demakratyčnym kandydatam. Sioleta Puhačova vystupiła ŭ abaronu śpievaka Andreja Makareviča, jakoha ŭ Rasii pačali ckavać paśla jaho vystupu suprać rasijskaj interviencyi Kryma. Darečy, adna z movaŭ, na jakoj śpiavaje Puhačova, — ukrainskaja.
Ciapier čytajuć
Prapahanda pryčapiłasia da «darahoha» hadzińnika Łatuški. Toj raskazaŭ, što heta za madel nasamreč9
Kamientary