Chakiejnyja zaŭziatary z Rasii, u adroźnieńnie ad futbolnych, pavodziać siabie vietliva. Ab hetym zajaviŭ rasijski pasoł Alaksandr Surykaŭ žurnalistam 10 maja paśla cyrymonii adkryćcia ŭ Minsku Doma balelščyka zbornaj Rasii pa chakiei.
«Nivodnaj prajavy chulihanstva nie zafiksavana ni pravaachoŭnymi orhanami Biełarusi, ni konsulstvam», — padkreśliŭ jon.
Surykaŭ taksama adznačyŭ, što «jość šmat rečaŭ, jakija demanstrujuć bractva Biełarusi i Rasii». «Sport staić na adnym ź pieršych miescaŭ. Ja nie raźjadnoŭvaju biełaruskich i rasijskich zaŭziataraŭ. Jany padtrymlivajuć i zbornuju Rasii, i zbornuju Biełarusi», — skazaŭ jon.
U svaju čarhu prezident Fiederacyi chakieja Rasii Uładzisłaŭ Traciak padkreśliŭ, što sport i palityku nielha źmiešvać: «Palityki ad hetaha ničoha nie vyjhrajuć, a spartsmieny tolki prajhrajuć, bo jany rychtujucca da spabornictvaŭ usio svajo žyćcio».
Jon zajaviŭ, što «sapraŭdy byli ludzi, jakija zaklikali da bajkotu jak Alimpijady ŭ Sočy, tak i čempijanatu śvietu pa chakiei ŭ Biełarusi». Ale, padkreśliŭ jon, Mižnarodnaja fiederacyja chakieja skazała, «što chakiej u Biełarusi pavinien być».
Adzin z rasijskich zaŭziataraŭ, viadomy dresiroŭščyk Edhard Zapašny, vykazaŭ padziaku biełaruskim arhanizataram čempijanatu za «vysoki ŭzrovień biaśpieki, spakoj i śviata ŭ horadzie».
Tym časam ŚMI sa spasyłkaj na vidavočcaŭ paviedamili, što niećviarozyja rasijskija zaŭziatary 9 maja vyviesili na aharodžy pasolstva Hruzii ŭ Biełarusi niekalki rasijskich ściahoŭ.
Pry hetym paviedamlajecca, što supracoŭniki milicyi, jakija achoŭvajuć hruzinskuju dypmisiju, nie pieraškadžali vyviešvańniu ściahoŭ, praŭda, jany nie dazvolili rasijanam źniać z fłahštoka hruzinski ściah.
Kamientary