Bahdankievič: Nieabchodnaści ŭ pryviazcy kursu biełaruskaha rubla da rasijskaha niama

Nieabchodnaści ŭ pryviazcy koštu biełaruskaha rubla da rasijskaha rubla ŭ finansavych uład Biełarusi niama. Takuju dumku vykazaŭ były staršynia praŭleńnia Nacyjanalnaha banka Stanisłaŭ Bahdankievič, analizujučy zaćvierdžany hałoŭnym bankam krainy kompleks mier «pa dalejšaj stabilizacyi situacyi ŭ finansavaj śfiery i adnaŭleńni ŭstojlivaści funkcyjanavańnia valutnaha rynku».

Siarod inšych mier, 9 studzienia Nacbank adnaŭlaje vykarystańnie miechanizmu pryviazki kursu biełaruskaha rubla da košyka zamiežnych valut. Pry hetym u struktury košyka dola rasijskaha rubla pavialičvajecca da 40%, a doli jeŭra i dołara ZŠA źnižajucca da 30% kožnaja.

«Raźliki z Rasijaj u nas usio roŭna iduć u dołaravaj acency. Kantrakty zaklučajucca na pastaŭku nafty, hazu i inšych tavaraŭ u dołarach ZŠA. Tamu nijakaj nieabchodnaści pryviazvacca da rasijskaha rubla niama», — miarkuje Bahdankievič. 

Jon taksama nahadaŭ, što niadaŭna sami biełaruskija ŭłady nastajali na tym, kab fiksavać ceny pry eksparcie charčavańnia ŭ Rasiju ŭ dołarach.

«Varta taksama ŭličvać, što kurs rasijskaha rubla adšturchoŭvajecca ad koštu dołara ZŠA. Zychodziačy z usiaho hetaha nie zusim zrazumiełaje rašeńnie biełaruskaha Nacbanka ŭ častcy «pryviazki» da rasijskaha rubla», — zaznačyŭ ekśpiert. 

U cełym, na dumku Bahdankieviča, papiaredni vopyt pryviazki da košyka valut nie daŭ ničoha stanoŭčaha. «Heta, viadoma, nie tak pryncypova, ale mnie zdajecca, što było b namnoha praściej, kali b kurs biełaruskaha rubla byŭ «pryviazany» da dołara ZŠA», — skazaŭ Bahdankievič.

Eks-kiraŭnik Nacbanka taksama miarkuje, što staŭka refinansavańnia, jakuju 9 studzienia Nacbank pavyšaje na 5 pracentnych punktaŭ da 25% hadavych, pa-raniejšamu nie adpaviadaje ekanamičnym realijam i adyhryvaje «virtualnuju rolu». «Staŭka nazvanaja, ale na jaje nichto ŭvahi ŭžo nie źviartaje», — zaznačyŭ ekśpiert. 

«Razumna było pavyšać da ŭzroŭniu maksimalnych stavak pa depazitach. Staŭka refinansavańnia — heta staŭka, pa jakoj dajucca resursy Nacyjanalnym bankam kamiercyjnym bankam. I kali siońnia resursy dajucca pad 50%, a zaŭtra buduć pad 40%, to čamu staŭka pavinna być 25%? Niekatoraje zbližeńnie stavak idzie. Ale čamu b nie abrezać heta ŭsio adnamomantna i bolš nie dapuskać hetych žartaŭ?» — zadaŭsia pytańniem eks-kiraŭnik Nacbanka. 

U cełym, na jaho dumku, pryniatyja Nacbankam miery zrobleny ŭ pravilnym kirunku, adnak nieabchodna ŭzhodnienaja z uradam realnaja prahrama dziejańniaŭ, strukturnych reform u ekanomicy, jakaja mahła b być padtrymanaja ŭ tym liku Mižnarodnym valutnym fondam i Jeŭrazijskim bankam raźvićcia. U hetym vypadku Biełaruś mahła b atrymać takija nieabchodnyja źniešnija zapazyčvańni. «Takoj ekanamičnaj prahramy pakul, na žal, niama», — padkreśliŭ Bahdankievič.

• 0
• 0
• 0
• 0
• 0
• 0
• 0
• 0