KamAZ zrabiŭ za hrošy Minabarony RF nikomu nie patrebny bronieaŭtamabil
Braniravany aŭtamabil KAMAZ-63969, raspracavany rasijskim Kamskim aŭtamabilnym zavodam, nie znajšoŭ svaju nišu, skazaŭ u intervju hałoŭny kanstruktar OAO KAMAZ pa pracy ź siłavymi strukturami Juryj Kucharenka.
Intervju braŭ niezaležny vajenny naziralnik Dzianis Makrušyn, jaki apublikavaŭ tekst u svaim błohu.
«Jaho (bronieaŭtamabil) bajavym pakul nie pryznajuć, a taki ŭzrovień abarony dla zvyčajnaj pieravozki ludziej prosta praźmierny», — skazaŭ Kucharenka.
Aŭtamabil atrymaŭ mocnuju braniavuju abaronu navat ad bujnakalibiernych kul kalibru 14,5 mm, a taksama, zhodna z zajavaj kanstruktara, vytrymlivaje vybuch 8 kh trynitratałuołu pad lubym miescam dnišča.
Adnak mašyna navat biez uzbrajeńnia atrymałasia vielmi ciažkaj — ciažejšaj za bolšaść savieckich, rasijskich i zachodnich bronietransparcioraŭ i bajavych mašyn piachoty. Da taho ž, masa nie dazvalaje mašynie być płavajučaj i atrymać šyroki śpiektr uzbrajeńnia i inšaha abstalavańnia — jana moža ŭziać na bort maksimum 4 tony karysnaj vahi navat paśla vykarystańnia bolš lohkaj kieramičnaj brani.
U bartach mašyny taksama niama bajnic dla ahniu z asabistaj zbroi desantnikaŭ, što choć častkova mahło b kampiensavać adsutnaść uzbrajeńnia.
U vyniku mašyna, jakaja vyrablałasia za košt Ministerstva abarony Rasii, atrymałasia niepatrebnaj.
«Choć jon vytrymaŭ vyprabavańni, apraŭdaŭ kanstruktyŭnyja zadumki, ale siońnia vajennym niezrazumieła, dzie jaho vykarystoŭvać. My budziem praciahvać vyprabavańni, ale jasnaści niama», — skazaŭ kanstruktar.
Kali Minabarony całkam admovicca ad KAMAZ-63969, to KAMAZ budzie sprabavać realizavać atrymanyja napracoŭki pry stvareńni płavajučaj mašyny dla marskoj piachoty, kaža kanstruktar.
Kamientary