Ministerstva adukacyi płanuje arhanizavać u Biełarusi manitorynh raboty sistemy vyšejšaj adukacyi. Pra heta paviedamiŭ kiraŭnik viedamstva Michaił Žuraŭkoŭ 24 lutaha ŭ Minsku na pieršym pasiadžeńni Hramadskaha respublikanskaha studenckaha savieta pry ministry adukacyi.
«Užo raspracavana ankieta, dzie praduhledžana hrafa dla acenki raboty vykładčyka jaho studentami», — raskazaŭ jon.
Jak paviedamlaje pres-słužba Minadukacyi, na sustrečy Žuraŭkoŭ zaklikaŭ studentaŭ razburyć mif ab tym, što ŭ biełaruskich VNU niedastatkova raźvitaje studenckaje samakiravańnie, a studentaŭ «nie čujuć ni na ŭzroŭni kiraŭnictva VNU, ni na ŭzroŭni Ministerstva adukacyi». «My chočam dać vam placoŭku dla pošuku adkazaŭ na hłabalnyja zadačy adukacyi. Vyznačycie sami, jakija zadačy va ŭniviersitecie vy chacieli b vykonvać i na što chacieli b upłyvać. Asnoŭnaja zadača studenckaha savieta — dapamahčy śpiecyjalistam u pošuku kanstruktyŭnych vyrašeńniaŭ prablem, što stajać pierad sistemaj adukacyi», — adznačyŭ ministr.
Kiraŭnik Minadukacyi maje namier arhanizavać sustreču členaŭ Hramadskaha studenckaha savieta z prezidyumam Respublikanskaha savieta rektaraŭ. Jon paprasiŭ studentaŭ pradumać pytańni, jakija jany ličać aktualnymi.
Kožnaja VNU pradstaŭlena ŭ studsaviecie adnym hołasam, niezaležna ad kolkaści jaje studentaŭ. Zhodna z zaćvierdžanym studentami pałažeńniem, «saviet źjaŭlajecca kalehijalnym daradčym vybarnym orhanam studenckaha samakiravańnia VNU». Adnym ź pieršych prajektaŭ savieta stanie zapusk u sacyjalnych sietkach hramadskaha abmierkavańnia «Adukacyja vačami moładzi».
Prapahanda pryčapiłasia da «darahoha» hadzińnika Łatuški. Toj raskazaŭ, što heta za madel nasamreč36
Kamientary