U praviły bytavoha absłuhoŭvańnia ŭniesienyja dapaŭnieńni i źmieny

Pastanovaj Savieta ministraŭ ad 2 krasavika № 268 uniesienyja źmieny i dapaŭnieńni ŭ praviły bytavoha absłuhoŭvańnia spažyŭcoŭ (vykładzienyja ŭ novaj redakcyi), paviedamili ŭ pres-słužbie Ministerstva handlu. 

Tam patłumačyli, što praviły bytavoha absłuhoŭvańnia spažyŭcoŭ, pradstaŭlenyja ŭ novaj redakcyi: adlustroŭvajuć realnyja patrabavańni da akazańnia kožnaj z bytavych pasłuh, pradstaŭlenaj u praviłach; dapaŭniajucca novymi raździełami — «Asablivaści akazańnia bytavych pasłuh sielskim kompleksnym pryjomnym punktam pa pryjomie zakazaŭ na bytavyja pasłuhi»; «Asablivaści akazańnia bytavych pasłuh pa padaračnych siertyfikatach, abaniemientach» i inšyja. «Subjekty, jakija akazvajuć bytavyja pasłuhi, dla pavieličeńnia spažyvieckaha popytu da svajho vidu pasłuh ukaraniajuć novyja mietady ažyćciaŭleńnia svajoj pradprymalnickaj dziejnaści, takija jak afarmleńnie padaračnych siertyfikataŭ i abaniemientaŭ dla spažyŭcoŭ. U toj ža čas vydača i vykarystańnie takich padaračnych siertyfikataŭ i abaniemientaŭ u halinie bytavoha absłuhoŭvańnia da hetaha času zakanadaŭstvam nie zmacavanyja, što ciahnuła za saboj źjaŭleńnie kanfliktnych situacyj i pavieličeńnie zvarotaŭ hramadzian u orhany dziaržaŭnaha kiravańnia», — patłumačyli ŭ viedamstvie. 

U raździele «Asablivaści akazańnia bytavych pasłuh pa techničnym absłuhoŭvańni i ramoncie miechaničnych transpartnych srodkaŭ» u patrabavańniach da dakumientacyi ŭličanyja «realii času: rost patrabavańniaŭ da jakaści pasłuh i kultury absłuhoŭvańnia». «Z metaj skaračeńnia kolkaści nielehalnych abjektaŭ aŭtaservisu ŭrehulavaha pytańnie pradastaŭleńnia pasłuh ruchomymi kompleksami servisnaha absłuhoŭvańnia aŭtamabilaŭ (novaja pasłuha aŭtaservisu, prapanavanaja biźnies-supolnaściami). Taksama prajektam urehulavany paradak akazańnia pasłuh pa techničnaj dapamozie na darozie i arendzie miechaničnych transpartnych srodkaŭ ad afarmleńnia zajaŭki da akazańnia samoj pasłuhi (raniej nie rehłamientavaŭsia)», — adznačyli ŭ pres-słužbie.

Spraščajecca paradak uzajemadziejańnia spažyŭca i vykanaŭcy ŭ pracesie akazańnia bytavoj pasłuhi (spraščajucca šyldy na abjektach, uparadkoŭvajecca infarmacyja na stendach, udakładniajucca patrabavańni da afarmleńnia zakazaŭ, dazvalajecca ŭzajemadziejańnie vykanaŭcy i spažyŭca praz elektronnyja vidy suviazi).

Ustanaŭlivajecca abaviazak vykanaŭcy ŭkazvać košt bytavoj pasłuhi ŭ biełaruskich rublach. 

Akramia taho, ustanaŭlivajecca prava invalidaŭ I hrupy, invalidaŭ z parušeńniem aporna-ruchalnaha aparatu II i III hrup na absłuhoŭvańnie ŭ abjektach bytavoha absłuhoŭvańnia ŭ pieršačarhovym paradku, a taksama pryjarytetnaje prava na akazańnie pasłuh cyrulniaŭ, fotapasłuh invalidam I hrupy, dzieciam-invalidam va ŭzroście da 18 hadoŭ, invalidam z parušeńniem aporna-ruchalnaha aparatu II i III hrup pa miescy znachodžańnia spažyŭca (na damu ŭ spažyŭca, u arhanizacyi achovy zdaroŭja i inšych miescach). 

Karektujucca asablivaści akazańnia tych ci inšych bytavych pasłuh.

Novaja redakcyja praviłaŭ nabyvaje moc praz try miesiacy paśla jaje aficyjnaha apublikavańnia. «Heta značyć, što subjektam, jakija akazvajuć bytavyja pasłuhi, advodzicca try miesiacy dla pryviadzieńnia ŭ adpaviednaść z zakanadaŭstvam: infarmacyjnych šyldaŭ, stendaŭ dla spažyŭcoŭ i inšaj infarmacyi ab vykanaŭcy i pasłuhach; dakumientaŭ, jakija paćviardžajuć zakaz; abaniemientaŭ, siertyfikataŭ na pasłuhi; paradku raźlikaŭ sa spažyŭcami za pasłuhi», — patłumačyli ŭ pres-słužbie.

• 0
• 0
• 0
• 0
• 0
• 0
• 0
• 0