Kreml dazvoliŭ sabie čytać lubuju pierapisku ŭ internecie?
Kanstytucyja Rasii zabaraniaje, ale kali vielmi chočacca, to možna.
Premjer-ministr Rasii Dźmitryj Miadźviedzieŭ padpisaŭ 8 krasavika pastanovu, što ŭstaloŭvaje praviły kantrolu za arhanizatarami raspaŭsiudu infarmacyi.
Pastanova dazvalaje Raskamnahladu rabić niepłanavyja pravierki arhanizataraŭ raspaŭsiudu infarmacyi — sajtaŭ i pravajdaraŭ.
U lik arhanizataraŭ raspaŭsiudu traplajuć «UKantakcie» i «Adnakłaśniki», «Jandeks» i Mail.ru i lubyja inšyja padobnyja servisy.
Siarod inšaha pastanova dazvalaje Raskamnahladu «ustaloŭvać fakty pryjomu, pieradačy, dastaŭki i (abo) apracoŭki [arhanizataram raspaŭsiudu infarmacyi] elektronnych paviedamleńniaŭ [karystalnikaŭ internetu]», a taksama «ažyćciaŭlać prahlad, analiz infarmacyjnych resursaŭ arhanizatara raspaŭsiudžvańnia infarmacyi, zapis i fiksacyju dziejańniaŭ, dastupnych karystalniku».
Niekatoryja ŭspryniali pastanovu jak dazvoł na prahlad luboj asabistaj pierapiski ŭ internecie — naprykład, ab hetym kaža Slon.ru.
Ale pastanova nie daje prava mienavita čytać lubuju pryvatnuju pierapisku — heta zabaroniena artykułam 23 Kanstytucyi RF.
Jak patłumačyŭ TJournal pres-sakratar Raskamnahladu, arhanizacyja atrymała prava tolki daviedvacca pra fakt pieradačy niejkaj infarmacyi, ale nie čytać paviedamleńni. Da taho ž, heta Raskamnahlad nie moža rabić z ułasnaj inicyjatyvy — tolki pavodle vyrašeńnia ŭpaŭnavažanaha pravaachoŭnaha orhanu (śpis takich orhanaŭ nieviadomy).
Dy čytać lubuju pierapisku dy vieści luboje prasłuchoŭvańnie biez vyrašeńnia sudu ŭ Rasii možna ŭ miežach apieratyŭna-vyšukovaj dziejnaści.
Robicca heta praź Sistemu techničnych srodkaŭ dla zabieśpiačeńnia funkcyj apieratyŭna-vyšukovych mierapryjemstvaŭ (skaročana — SORM). Što takoje SORM — dakładna nie viedaje, peŭna, nichto akramia śpiecsłužb. Ale apieratary suviazi, a z 2014 hoda i sacsietki dy forumy, musiać padklučyć SORM. Kali nie padklučać — dziejnaść musiać prypynić.
Kamientary