Suśvietny bank prahnazuje ekanamičny spad u Biełarusi ŭ 2015—2016 hadach

Vałavy ŭnutrany pradukt Biełarusi ŭ 2015—2016 hadach źnizicca ŭ realnym vyražeńni ŭ vyniku słabaha źniešniaha popytu i bolš nizkich cen na naftu. Taki prahnoz utrymlivajecca ŭ makraekanamičnym ahladzie Suśvietnaha banka, prezientacyja jakoha adbyłasia ŭ Minku 27 krasavika. 

«My miarkujem, što VUP Biełarusi ŭ realnym vyražeńni pamienšycca na 3,5% u 2015 hodzie i na 1% u 2016 hodzie. Tolki ŭ 2017 hodzie my čakajem viartańnia biełaruskaj ekanomiki na trajektoryju rostu», — zajaviŭ na prezientacyi makraekanamičnaha ahladu staršy ekanamist Suśvietnaha banka Rusłan Pijantkoŭski. Jon taksama zaznačyŭ, što inflacyja ŭ krainie ŭsio jašče zachoŭvajecca vysokaj i čakajecca bankam na ŭzroŭni 18,8% u 2015 hodzie.

Na dumku ekśpiertaŭ Suśvietnaha banka, palityka stymulavańnia ŭnutranaha popytu ŭ Biełarusi, jakaja źjaŭlałasia asnoŭnaj krynicaj rostu ŭ papiarednija hady, vyčarpała siabie. U toj ža čas, dadajuć jany, naftavaja halina nie zdolnaja stać drajvieram ekanamičnaha rostu Biełarusi z pryčyny nizkich suśvietnych cen na naftu. 

«Uličvajučy, što pradukty naftapierapracoŭki składajuć adnu šostuju častku pramysłovaha vypusku i bolš za tracinu biełaruskaha ekspartu, a ceny na naftu prahnazujucca na nizkim uzroŭni, heta akaža niespryjalnaje ŭździejańnie na źniešnija rachunki, dachody biudžetu i, jak vynik, na ekanamičny rost», — havorycca ŭ ahladzie. 

Na dumku ekśpiertaŭ Suśvietnaha banka, asłableńnie biełaruskaj ekanomiki stvoryć cisk na realnuju zarabotnuju płatu i moža pryvieści da rostu biespracoŭja, «tym samym stvarajučy ryzyki pavyšeńnia ŭzroŭniu biednaści». 

«Aptymalnymi mierami palityki, što prymajucca ŭ adkaz na isnujučyja ryzyki, stali b pavyšeńnie prazrystaści i adrasnaści sistem sacyjalnaj abarony z adnačasovym paskareńniem strukturnych pieraŭtvareńniaŭ dla pavyšeńnia vytvorčaha patencyjału ekanomiki», — rekamiendujuć biełaruskim uładam ekśpierty Suśvietnaha banka.

Na dumku ekanamistaŭ banka, palityka makraekanamičnaj stabilizacyi, što pravodzicca ŭ krainie, «sama pa sabie niedastatkovaja dla adnaŭleńnia rostu. Biez strukturnych reform isnujučyja dysbałansy i ŭraźlivaść, vierahodniej za ŭsio, uzmacniacca».

U suviazi z hetym ekśpierty Suśvietnaha banka rekamiendujuć biełaruskim uładam pajści pa šlachu strukturnaj transfarmacyi ekanomiki, jakaja b uklučała miery pa transfarmacyi siektara dziaržpradpryjemstvaŭ, pierahlad miechanizmu raźmierkavańnia finansavych resursaŭ, padtrymku raźvićcia pryvatnaha siektara. 

«Niekatoryja miery pa ŭzmacnieńni patencyjału rostu mohuć być realizavanyja ŭžo ŭ 2015—2016 hadach. Takimi mierami mohuć stać zaćviardžeńnie płana z dakładna abaznačanymi terminami pa skaračeńni resursaŭ, jakija raźmiarkoŭvajucca praz roznyja kanały dziaržaŭnaj padtrymki, i ŭkazańniem kankretnych kolkasnych štohadovych metavych pakazčykaŭ», — ličać ekśpierty Suśvietnaha banka.

• 0
• 0
• 0
• 0
• 0
• 0
• 0
• 0