Z pačatku hoda Biełaruś impartavała ź Vieniesueły tavaraŭ na… $600

28 traŭnia pačaŭsia vizit Alaksandra Łukašenki ŭ Pakistan. Da jaho pryjezdu ŭžo padpisana kantraktaŭ na 60 młn dołaraŭ. Žurnalisty ANT zajavili, što zaklučeńnie handlovych damovaŭ u Pakistanie moža stać nie mienš pierśpiektyŭnym dla vychadu na paŭdniovaazijacki rynak, čym vychad na rynki Paŭdniovaj Amieryki praź Vieniesuełu.

Ale Vieniesueła – nie samy dobry prykład stasunkaŭ! Aktyŭnyja handlovyja adnosiny Biełaruś pačała raźvivać ź Vieniesuełaj z 2010 hoda. Tady tavaraabarot pamiž krainami padskočyŭ na 1,2 młrd dołaraŭ, ale bolš nikoli my tak dobra nie handlavali. U 2014 hodzie tavaraabarot Vieniesueły i Biełarusi skłaŭ 99,7 młn, a za studzień-sakavik hetaha hoda – tolki 3,9 młn dołaraŭ. Pryčym impartavana ź Vieniesueły tolki (!) na 600 dołaraŭ – zapčastki da aŭtamabilnaj techniki.

Za studzień-sakavik 2015 hoda, jašče da padpisańnia handlovych kantraktaŭ, tavaraabarot Pakistana i Biełarusi byŭ u piać razoŭ vyšejšym, čym ciapier ź Vieniesuełaj – 19,5 młn dołaraŭ.

Siońnia nazirajecca padzieńnie tavaraabarotu i z krainami Paŭdniovaj Amieryki, na rynki jakich «Biełaruś vyjšła praź Vieniesuełu». Kali ŭ 2010 hodzie handlavali na 2,66 młrd dołaraŭ, ciapier – tolki miljard.

Pavialičyć

Biełaruś mieła niamała pradstaŭnictvaŭ svaich kampanijaŭ u Vieniesuele, byli stvoranyja i sumiesnyja pradpryjemstvy. My pastaŭlali ŭ paŭdniovaamierykanskuju respubliku mašynakamplekty hruzavych aŭtamabilaŭ, traktaroŭ dla taho, kab ich źbirali ŭžo ŭ Vieniesuele. Zdabyvali naftu na terytoryi hetaj krainy, zajmalisia naftavym servisam. Jeŭraradyjo pasprabavała vyśvietlić, jak u hetych kampanijach iduć spravy.

Pradstaŭnica adździełu pa prodažach u Łacinskuju Amieryku zavoda MAZ nazvać dakładnyja abjomy pastavak nie moža – kamiercyjnaja tajamnica. Ale adznačaje, što ŭ paraŭnańni z 2013 i 2014 hadami ciapier našmat mieniej.

«U Vieniesuele źmianiłasia abstanoŭka ŭ cełym: u ich tam ciapier praciahły finansavy kryzis, tamu jany majuć ciažkaści z apłataj», – tłumačyć situacyju pradstaŭnica zavoda.

U sumiesnaj biełaruska-vieniesuelskaj kampanii «Pietralera BiełaVieniesałana», jakaja zajmajecca raspracoŭkaj radoviščaŭ nafty i hazu, razmaŭlać pra situacyju z prodažami admaŭlajucca, spasyłajučysia na toje, što «ciapier nie samy spryjalny pieryjad». Maŭlaŭ, pačakajcie vizitu vieniesuelskaha prezidenta ŭ Biełaruś, tady, moža, spravy pojduć lepiej, paśla hetaha i parazmaŭlajem.

• 0
• 0
• 0
• 0
• 0
• 0
• 0
• 0