U Minsku stvarajecca pieršaja ŭ respublicy sietka kantaktnych zaaparkaŭ «Kraina Janocija», žyvioł u jakich možna budzie hładzić, karmić i navat hrymiravać. Niezvyčajnyja ŭstanovy adkryjuć hetym letam u handlova-zabaŭlalnych centrach «Tytan» i «Civali», paviedamili ŭ kamunikacyjnym ahienctvie AHT.
«Kraina Janocija» budzie naličvać kala dziesiaci ŭstanoŭ u roznych miescach Minska. Aficyjnuju cyrymoniju adkryćcia pieršych takich zaaparkaŭ płanujecca pravieści bližej da vosieni, ale pracavać jany pačnuć raniej. Tak, u HZC «Tytan» na praśpiekcie Dziaržynskaha amataraŭ žyvioł čakajuć u siaredzinie lipienia, a ŭ HZC «Civali» na vulicy Prytyckaha — u pačatku žniŭnia.
Płošča kožnaha takoha zaaparka pieravysić 300 kv.m. U valjerach adkrytaha typu raźmieściacca poni, kamierunskija kozy, aviečki i alpaki. Taksama ŭsie žadajučyja zmohuć pahładzić i pakarmić marskich śvinak, trusoŭ, vaviorak, kapibar i małpaŭ. Siarod žyvioł možna budzie ŭbačyć janotaŭ (nasuch i pałaskunoŭ), kienhuru, lemuraŭ, janotapadobnych sabak i afrykanskich vožykaŭ. Z ptušak prapanujuć patrymać u rukach kačak-mandarynak, pakarmić lebiedziaŭ, dekaratyŭnych kurej, chvalistych papuhajaŭ, kakarykaŭ i amadzinaŭ.
Usiaho ž u kantaktnym zaaparku budzie pradstaŭlena kala 30 vidaŭ źviaroŭ i ptušak. Kala 90 pracentaŭ žyvioł možna budzie pahładzić, pakarmić i pafarbavać z dapamohaj akvahrymu. Asobnaje miesca ŭ zaaparku vydzielać dla dziciačaj tvorčaści, dzie dzieci zmohuć pamalavać, paŭdzielničać u roznych majstar-kłasach, pahladzieć multfilmy. Śviatočnuju atmaśfieru stvoryć animatar.
Kožny zaapark aformiać u peŭnym styli. Tak, u «Tytanie» budzie abyhrana animacyja «Siamiejka Kruds», što nahadaje areał pražyvańnia pieršabytnaj siamji, a zaapark u HZC «Civali» ŭznović pustynny piejzaž.
Asnoŭnaj svajoj aŭdytoryjaj uładalniki sietki nazyvajuć dziaciej va ŭzroście ad 3 hadoŭ, ale abiacajuć, što cikavym naviedvańnie zaaparka stanie i dla darosłych. Darečy, žyvioł možna budzie ŭbačyć i pa-za ŭstanovaj, naprykład, na navučalnych sieminarach u škołach i dziciačych sadach. Akramia taho, u płanach — sieansy ipaterapii, a taksama dabračynnyja akcyi dla dziaciej z abmiežavanymi mahčymaściami.
Kamientary