Heta klasyčnaja metoda: mabilizuje elektarat; dapamahaje śpisvać ekanamičnyja ciažkaści na vorahaŭ; narešcie, raźviazvaje ruki, kab truščyć "piatuju kalonu". Piša ŭ svaim błohu Alaksandar Kłaskoŭski.
Savieckich ludziej, jak viadoma, nadta niepakoiŭ Handuras. Biełarusam prapanujecca hałaŭny bol u vyhladzie Kosava dy supraćrakietaŭ. Hetyja prablemy vyłučyŭ Alaksandar Łukašenka na naradzie ź siłavikami 18 sakavika.
Nu zrazumieła, kali nakont Kosava dy supraćrakietnaj abarony pierajmajecca Maskva. Ale našto našaj krainie, dalokaj ad hlabalnych ambicyj, być da kožnaj bočki špuntam?
Tut svaja matyvacyja. Pa-pieršaje, i ŭ kosaŭskim pytańni, i ŭ pytańni supraćrakietaŭ uvieś ahoń z amerykancaŭ haryć. Pa-druhoje, mechanika vyrašeńnia kosaŭskaj prablemy sapraŭdy nie vyhladaje idealnaj, dyj raźmiaščeńnie elementaŭ supraćrakietnaj abarony ŭ Polščy i Čechii daloka nia ŭsimi ŭchvalajecca navat u samich hetych krainach.
Karaciej, pytańni nieadnaznačnyja. Na ich tle i sankcyi suprać "Biełnaftachimu" zručniej traktavać jak prajavu ŭsio taho ž hiehiemanisckaha stylu, padvojnych standartaŭ, maskujučy sutnaść pretenzijaŭ ZŠA da "apošniaj dyktatury Eŭropy".
Aficyjny kiraŭnik zajaviŭ, što Biełaruś musić być hatovaja da padvyšeńnia napružanaści ŭ śviecie. U palitalohii daŭno jość ustojlivaja definicyja — "stvareńnie atmasfery atočanaj krepaści". Heta klasyčnaja metoda: mabilizuje elektarat; dapamahaje śpisvać ekanamičnyja ciažkaści na vorahaŭ; narešcie, raźviazvaje ruki, kab truščyć "piatuju kalonu".
Cikava, što ŭ Maskvie tym časam Kandaliza Rajs pieramaŭlałasia ź Miadźviedzievym. Novy rasiejski prezydent moža nabrać punktaŭ u vačoch Zachadu, ułahodziŭšy praź niejki čas kanflikt vakoł supraćrakietaŭ. Mienskija ž stratehi chočuć tut vyhladać bolšymi katalikami, čym papa.
Zaŭvažcie: u toj čas jak navakolny śviet malujecca ŭ styli žudaścika (z usich bakoŭ varožyja padkopy, hiehiemon šaleje, suśvietny paradak chistajecca), z dapamohaj brytanskaha łorda-pijarnika Beła miarkujecca prasoŭvać pa planecie bukaličny vobraz biełaruskaj ułady.
To bok strašyłki — pradukt dziela ŭnutranaha spažyvańnia. Nasamreč spalvać masty ŭ dačynieńniach z praklatymi buržuinami nia chočacca. Naadvarot — chočacca trochi spadabacca, kab adškadavali kredytaŭ, investycyjaŭ dy inšych dabrotaŭ. Jak tam u klasyka? "Upadabajcie nas čornieńkimi, bo bieleńkimi nas kožny ŭpadabaje".
Ciapier čytajuć
22‑hadovy Viktar z-pad Klecka pratrymaŭsia na froncie miesiac. A paśla baćki pierasvarylisia, dzielačy hrabavyja8
Kamientary