U Biełarusi aryštavali francuzskaha adstaŭnoha vajskoŭca, jaki zachaplajecca ciahnikami. Užo try miesiacy jon u SIZA
Pajezdka z žonkaj da jaje svajakoŭ u Biełarusi skončyłasia dla francuza Barysa zatrymańniem. Jahonyja rodnyja nie majuć dakładnaj infarmacyi pra toje, dzie mienavita jon znachodzicca, u jakich umovach utrymlivajecca, jaki ŭ jaho stan zdaroŭja i ci maje jon dostup da advakata.
Francuz Barys šmat hadoŭ słužyŭ aficeram u francuzskim vojsku, a paśla praciahnuŭ karjeru inžynieram u enierhietyčnaj śfiery. Jon zachaplajecca muzykaj, ale hałoŭnaja jahonaja cikavaść ź dziacinstva — ciahniki. Pra ich navat pisaŭ šerah artykułaŭ dla śpiecyjalizavanych časopisaŭ.
U krasaviku 2026 hoda Barys razam z žonkaj pryjechaŭ u Biełaruś u turystyčnuju pajezdku, kab naviedać jaje siamju.
Ale padčas hetaj pajezdki zdaryłasia toje, čaho siamja nie mahła pradbačyć. Barysa zatrymali, i ŭžo čaćviorty miesiac rodnyja, pavodle ich słoŭ, nie majuć aficyjnaj infarmacyi pra toje, dzie mienavita jon znachodzicca, u jakich umovach jaho ŭtrymlivajuć i ci maje jon dostup da advakata.
Pra abstaviny pajezdki i zatrymańnia raskazaŭ u sacsietkach Žuljen Ryze, stryječny brat Barysa
Pavodle Žuljena Ryze, padčas znachodžańnia ŭ Biełarusi Barys pajšoŭ ahledzieć navakolle i sfatahrafavać ciahnik, kab paśla abmierkavać jaho sa svaimi siabrami, jakija taksama cikaviacca čyhunkaj.
Jak śćviardžaje Ryze, u hety momant za Barysam nibyta sačyŭ i zdymaŭ jaho bieśpiłotnik. Nieŭzabavie francuza zatrymała milicyja. Stryječny brat ličyć, što heta adbyłosia biez pryčyny.
Z taho času, pavodle Žuljena, siamja nie maje ad Barysa nijakich navin.
Siamja i siabry Barysa źviartalisia ŭ Jelisiejski pałac, Ministerstvy ŭnutranych i zamiežnych spraŭ Francyi, da sienataraŭ, parłamientaryjaŭ, u ambasady i roznyja niaŭradavyja arhanizacyi. Pavodle Žuljena, u adkaz jany atrymlivali tolki paćviardžeńni, što zvaroty pryniatyja, i paviedamleńni pra toje, što spravaj zajmajucca.
Adnak, jak śćviardžaje stryječny brat, siamja tak i nie atrymała aficyjnych dakumientaŭ pra zatrymańnie Barysa.
Rodnyja spadziajucca, što publičnaść dapamoža zrušyć situacyju ź miesca, nie dazvolić, kab pra Barysa zabylisia, i dapamoža jamu atrymać nieabchodnuju abaronu.
Druhi vajskoviec, jaki zahinuŭ pry avaryi MAZa pad Asipovičami — 21‑hadovy tenisist ź Viciebska1
Kamientary