Jak uziać i spahanić kłasiku — recenzija na «Honar i pieraduziataść i zombi»
Žanr: žachi, bajavik, mieładrama
Režysior: Bior Ścirs
U rolach: Lili Džejms, Sem Rajli, Bieła Chitkat, Eli Bambier, Mili Brejdzi, Sjuki Uoterchaŭs, Duhłas But, Seli Filips.
ZŠA, Vialikabrytanija, 107 chv.
Adznaka: 6.
Hadami Anhliju raździraje zahadkavaja chvaroba: połčyščy mierćviakoŭ vyłaziać z-pad ziamli i imknucca pakaštavać na smak mirnaje nasielnictva. Šlachieckija siemji pasyłajuć svaich dziaciej u Japoniju i Kitaj dla navučańnia bajavym mastactvam, kab tyja mahli supraćstajać napadam zombi.
Paśla taho, jak nasielniki majontka Nezierfiłd-park byli całkam vyniščanyja, jaho aranduje džentlmien pa proźviščy Binhli. Nieŭzabavie jon zavodzić znajomstva z susiedziami, u liku jakich piać dačok pary Bieniet — vybitnyja vajaŭnicy, abaroncy i apora hrafstva, asabliva enierhičnaja Elizabet Bieniet — majstar bajavych mastactvaŭ i zbroi. Na bali jana sustrakaje pałkoŭnika Darsi — žorstkaha zabojcu zombi i ŭvasableńnie pieraduziataści ŭ vyšejšym sasłoŭi. Kali zombi-epidemija ŭzmocnicca, im daviadziecca pierastupić praz honar i abjadnacca na poli boju.
Mieładramatyčny film žachaŭ źniaty pa adnajmiennym ramanie Seta Hrem-Śmita — mešap-parodyi na «Honar i pieraduziataść» anhlijskaha kłasika Džejn Ościn.
Na radzimie, u Brytanii, raman Džejn Ościn uvachodzić u školnuju prahramu. Piśmieńnik Hrem-Śmit pasprabavaŭ dać novaje žyćcio i pryciahnuć uvahu da kłasiki, pamiaściŭšy viadomy siužet u inšy anturaž.
Hałoŭnuju rolu vykanała maładaja aktrysa Lili Džejms («Papiałuška» (2015), «Abactva Daŭntan» (z 2010)). Duet joj skłaŭ Sem Rajli («Malefisenta» (2014)).
Maładyja akciory nie pakazali najvyšejšaha kłasu ŭ pastanoŭcy masavych bojek, a sam siužet filma schilajecca to ŭ bok choraru, to mieładramy.
***
Mešap (anhł. Mashup — źmiešvańnie) — žanr, u jakim za asnovu ŭziatyja realnyja histaryčnyja postaci ci kłasičnyja tvory. Pieršapačatkova paŭstaŭ u halinie kampjutaraŭ i muzyki.
Kamientary