U vyniku vybuchaŭ i abvalvańnia na šachcie «Paŭnočnaja» ŭ Varkucie zahinuli čatyry čałavieki, los 26 šachcioraŭ nieviadomy, paviedamili ŭ śledčym kamitecie Rasii.
Pa słovach kiraŭnika MNS Uładzimira Pučkova, ratavalniki sprabujuć naładzić suviaź z šachciorami, jakija ŭsio jašče zastajucca ŭ avaryjnaj šachcie. Vyratavalnaja apieracyja ŭskładnienaja praz zavały i zadymleńnie ŭ šachcie, dadaŭ jon.
U Komi ŭviedzieny režym nadzvyčajnaj situacyi. Jon abvieščany na čas praviadzieńnia pošukava-vyratavalnaj apieracyi i likvidacyi avaryi, paviedamiła pres-słužba administracyi respubliki.
U čaćvier na šachcie adbyŭsia vykid mietanu i ź intervałam u hadzinu prahrymieli dva vybuchi, jakija pryviali da abvalvańnia i ŭzharańnia.
Usiaho ŭ šachcie znachodzilisia 110 čałaviek. Na pavierchniu vyvieli 80 harniakoŭ, los 26 harniakoŭ pakul zastajecca nieviadomym.
Pa fakcie zdareńnia raspačataja kryminalnaja sprava, jakuju budzie rasśledavać centralny aparat Śledčaha kamiteta RF.
Na miescy ciapier pracujuć ratavalniki.
Jak adznačaje TASS sa spasyłkaj na krynicy ŭ pravaachoŭnych orhanach respubliki Komi, za čas pracy šachty «Paŭnočnaja» adbyłosia piać avaryj, u vyniku jakich zahinuli 35 čałaviek.
Šachta «Paŭnočnaja» naležyć AAT «Varkutavuhal», jakoje ŭ svaju čarhu ŭvachodzić u «Poŭnačstal» Alaksieja Mardašova. Pradpryjemstva viadzie zdabyču kaksaŭnoha vuhalu.
Kamientary