Siabry kampanii «Eŭrapiejskaja Biełaruś» i arhanizacyi «Małady front» pryjšli siońnia a 12-j hadzinie da Nacyjanalnaj biblijateki, dzie adbyvałasia aficyjnaje śviatkavańnie Pieršamaja. Usich zatrymanych, aproč staršyni arhkamitetu pa stvareńni BSDP «NH» Mikałaja Statkieviča, vypuścili.
Pakul kamunisty i sacyjał-demakraty partyi Kazulina adznačali Pieršamaj na Banhałory, siabry kampanii «Eŭrapiejskaja Biełaruś» i arhanizacyi «Małady front» pryjšli siońnia a 12 hadzinie da Nacyjanalnaj biblijateki, dzie adbyvałasia aficyjnaje śviatkavańnie. Z takoj inicyjatyvaj vystupiŭ staršynia arhkamitetu pa stvareńni BSDP «NH» Mikałaj Statkievič.
Niekalki dziesiatkaŭ maładzionaŭ sprabavali razharnuć na placoŭcy la biblijateki ściahi Eŭrasajuzu, a Mikoła Statkievič navat paśpieŭ praz mehafon pavinšavać prysutnych sa śviatam salidarnaści pracoŭnych, paśla čaho jaho zatrymali. Amonaŭcy chutka pavyryvali ściahi, a samich demanstrantaŭ zapichali ŭ milicejskija aŭtobusy.
Usich aryštavanych advieźli ŭ Pieršamajski RUUS. Pa słovach moładzievaha lidera Ivana Šyły, jaki taksama byŭ zatrymany, supracoŭniki milicyi parvali Źmitru Chviedaruku pinžak, kašulu i štany. Chłopca praciahnuli pa asfalcie kala 150 metraŭ. Ivan Šyła taksama skazaŭ, što ŭ milicejskim aŭtobusie suprać Źmitra Daškieviča, Artura Fińkievič i ŭsio taho Źmitra Chviedaruka ŭžyvałasia fizyčnaja siła.
Pad ścienami pastarunku adrazu sabralisia aktyvisty z partretami aryštavanych. Moładź stała ŭ łancuh pierad RUUS, pravodziačy akcyju salidarnaści. I tady było zatrymana niekalki čałaviek. U liku zatrymanych apynuŭsia navat žurnalist hazety «Biełorusy i rynok» Hienadź Barbaryč, ale praź niejki čas jaho vyzvalili.
Paadpuskali z pastarunku i niepaŭnaletnich. Na ŭsich astatnich, pa słovach Ivana Šyły, składajuć pratakoły administracyjnych pravaparušeńniaŭ. Amonaŭcy kažuć zatrymanym, maŭlaŭ, sustreniemsia zaŭtra na sudach.
Dakładna viadoma, što siarod zatrymanych znachodziacca Źmicier Daškievič, Artur Fińkievič, Źmicier Chviedaruk, Alaksiej Janušeŭski, Jaŭhien Afnahiel, Maksim Dašuk, Mikita Krasnoŭ, Źmicier Barodka, Pavał Kurjanovič.
17:51. Vypuścili ŭsich zatrymanych, aproč Mikoły Statkieviča. Na Źmitra Daškieviča, Artura Fińkieviča, Źmitra Chviedaruka, Jaŭhiena Afnahiela i Paŭła Juchnieviča skłali pratakoły za ŭdzieł u niesankcyjanavanaj akcyi. Z chłopcaŭ uziali tolki vusnaje abiacańnie, što pa pieršaj ža poźvie jany źjaviacca ŭ sud.
Što da Statkieviča, to, najchutčej, sudzić jaho buduć zaŭtra, a noč palityk praviadzie ŭ izalatary na vulicy Akreścina.
Kamientary